உயர் கல்விக்காக இங்கிலாந்துக்குச் சென்ற இந்திய மாணவர் ஒருவர், லண்டனில் உள்ள அவரது அறையில் மர்மமான முறையில் சடலமாக மீட்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. தெலுங்கானா மாநிலம் காமரெட்டி மாவட்டத்தின் தாளமட்லா கிராமத்தைச் சேர்ந்த 25 வயதான எஸ். ஸ்ரீநாத் ரெட்டி என்பவரே இவ்வாறு உயிரிழந்தவர் ஆவார். லண்டனில் உள்ள ‘டி மான்ட்ஃபோர்ட்’ பல்கலைக்கழகத்தில் முதுகலை பட்டப்படிப்பு படிப்பதற்காகக் கடந்த 14 மாதங்களுக்கு முன்பு லண்டன் சென்ற இவரது இந்தத் திடீர் மரணம், அவரது சொந்தக் கிராம மக்களிடையே பெரும் சோகத்தை ஏற்படுத்தியுள்ளது.
உயிரிழப்பதற்கு முந்தைய நாள் இரவு (ஜூன் 22) ஸ்ரீநாத் ரெட்டி இந்தியாவில் உள்ள தனது குடும்பத்தினருடன் தொலைபேசியில் சாதாரண முறையிலேயே மிகவும் மகிழ்ச்சியாகப் பேசியுள்ளார். அப்போது தங்களுக்கு எவ்வித சந்தேகமும் ஏற்படவில்லை என்று அவரது தந்தை மதுசூதன் ரெட்டி கண்ணீருடன் தெரிவித்துள்ளார். குடும்பத்தினருடன் பேசி முடித்த பிறகு, அன்று இரவு லண்டனில் நடைபெற்ற தனது நண்பரின் பிறந்தநாள் விழா ஒன்றில் ஸ்ரீநாத் ரெட்டி கலந்து கொண்டுள்ளார். ஆனால், மறுநாள் காலை ஜூன் 23 அன்று அவர் தங்கியிருந்த அறையிலேயே சடலமாகக் கண்டெடுக்கப்பட்டுள்ளார்.
ஸ்ரீநாத் ரெட்டியின் அறையில் அவருடன் தங்கியிருந்த மற்றொரு அறத் தோழர் (Roommate), ஸ்ரீநாத் தூக்கிட்டுத் தற்கொலை செய்து கொண்டதாகக் கூறியுள்ளார். எனினும், ஸ்ரீநாத் ரெட்டி இறந்த விவகாரத்தை அவரது அறத் தோழர் மற்ற நண்பர்களுக்கும், குடும்பத்தினருக்கும் உடனடியாகத் தெரிவிக்காமல் மிகவும் தாமதமாகவே தெரிவித்துள்ளார். இந்தத் காலதாமதம் தான் ஸ்ரீநாத்தின் மரணத்தில் பல்வேறு சந்தேகங்களையும், கேள்விகளையும் எழுப்பியுள்ளதாக அவரது பெற்றோர் மற்றும் உறவினர்கள் குற்றம் சாட்டுகின்றனர். தற்போது லண்டன் மாநகரப் போலீசார் இது குறித்து வழக்குப் பதிவு செய்து தீவிர விசாரணை மேற்கொண்டு வருகின்றனர்.
ஏழை விவசாயக் குடும்பத்தைச் சேர்ந்த ஸ்ரீநாத் ரெட்டியின் உயர்கல்விக்காக அவரது பெற்றோர் பெரும் தொகையைக் கடனாகப் பெற்று லண்டனுக்கு அனுப்பி வைத்துள்ளனர். தற்போது தங்களின் மகனின் மரணத்திற்கான உண்மையான காரணத்தைக் கண்டறியவும், லண்டனில் உள்ள அவரது உடலை விரைவாகத் தாயகம் கொண்டு வரவும் உதவ வேண்டும் என்று மத்திய அரசு மற்றும் தெலுங்கானா மாநில அரசுக்கு ஸ்ரீநாத்தின் குடும்பத்தினர் அவசரக் கோரிக்கை விடுத்துள்ளனர்.
