பெல்ஜியம் நாட்டின் கிழக்கு பிளாண்டர்ஸ் (East Flanders) மாகாணத்தில் உள்ள ஒரு பழைய வீட்டைச் சீரமைக்கும் பணியில் ஈடுபட்டிருந்த கட்டிடத் தொழிலாளர்களுக்கு, அடித்தளத்துச் சுவருக்குள் இருந்து சுமார் 9 மில்லியன் யூரோ (இந்திய மதிப்பில் சுமார் ₹83 கோடிக்கும் மேல்) மதிப்புள்ள தங்கக் கட்டிகள் மற்றும் நாணயங்கள் கண்டெடுக்கப்பட்டுள்ளன. கழிவுநீர் அமைப்பிற்கான குழாய்களைப் பதிப்பதற்காகத் தரையைக் தோண்டும் போது, சுவருக்குள் ரகசியமாக அடைக்கப்பட்டிருந்த பெட்டியில் இருந்த இந்த பிரம்மாண்ட புதையல் கண்டுபிடிக்கப்பட்டுள்ளது.
கோடைகாலப் பகுதிநேரப் பணியில் ஈடுபட்டிருந்த 18 வயது மாணவர் ஒருவர் மற்றும் அவரது சக தொழிலாளர்கள் இணைந்து இந்தப் புதையலைக் கண்டுபிடித்துள்ளனர். முதலில் சாதாரண நாணயங்கள் என்று கருதிய தொழிலாளர்கள், பின்னர் அவை உண்மையான தங்கக் கட்டிகள் மற்றும் பழங்காலச் தங்க நாணயங்கள் என்பதை உணர்ந்து உடனடியாகக் காவல்துறைக்குத் தகவல் தெரிவித்தனர். சம்பவ இடத்திற்கு வந்த காவல்துறையினர் சுமார் 49 தங்கக் கட்டிகளையும், 4,000-க்கும் மேற்பட்ட தங்க நாணயங்களையும் மீட்டுப் பாதுகாப்பான அரசு கருவூலத்திற்கு மாற்றியுள்ளனர்.
தற்போது இந்த மர்மப் புதையல் யாருக்குச் சொந்தம் என்ற சட்டரீதியான கேள்வி எழுந்துள்ளது. புதையல் கண்டுபிடிக்கப்பட்ட கட்டிடம் CAW Oost-Vlaanderen என்ற சமூக தொண்டு நிறுவனத்திற்குச் சொந்தமானது என்பதால், இந்தத் தொகையானது தங்களது தொண்டு நிறுவனத்தின் மக்கள் நலப்பணிகளுக்குக் பயன்படும் என அதன் நிர்வாகிகள் நம்பிக்கை தெரிவித்துள்ளனர். அதேவேளையில், பெல்ஜியம் நாட்டின் சட்டப்படி, புதையலின் உண்மையான உரிமையாளர் யார் என்பதைக் கண்டறிய ஐந்து ஆண்டுகள் வரை அவகாசம் வழங்கப்படுகிறது.
அடுத்த 5 ஆண்டுகளுக்குள் உரிய ஆதாரங்களுடன் உரிமையாளர்கள் யாரும் வராவிட்டால், அரசு விசாரணையில் அந்தத் தங்கம் எந்தக் குற்றச் செயல்களுடனும் தொடர்புடையது அல்ல என்பது உறுதி செய்யப்பட்ட பின்னரே பகிர்ந்தளிக்கப்படும். சட்டப்படி, அத்தகைய சூழலில் இந்தத் தொகையானது புதையலைக் கண்டுபிடித்த தொழிலாளர்களுக்கும், நிலத்தின் உரிமையாளரான தொண்டு நிறுவனத்திற்கும் பாதியாகப் பிரித்து வழங்கப்படும். இதற்கிடையே, பொதுமக்களும் புதையல் வேட்டைக்காரர்களும் கட்டிடத்திற்குள் நுழைவதைத் தடுக்க அந்தப் பகுதியில் பலத்த போலீஸ் பாதுகாப்பு போடப்பட்டுள்ளது.
