தமிழக சட்டப்பேரவையில் 110 விதியின் கீழ், மாநிலத்தின் அனைத்து 234 சட்டமன்ற உறுப்பினர்களுக்கும் (MLAs) அரசு சார்பில் இலவச கார், ஓட்டுநர், பராமரிப்பு மற்றும் உதவியாளர் செலவுகளுக்காக மாதம் ₹1 லட்சம் வழங்கப்படும் என்ற அறிவிப்பை முதல்வர் சி. ஜோசப் விஜய் வெளியிட்டார். முதல் முறை எம்.எல்.ஏ-க்கள் மற்றும் எளிய பின்னணியில் இருந்து வந்தவர்கள் மக்கள் பணியாற்றுவதற்கு வசதியாக இந்த நடவடிக்கை எடுக்கப்பட்டுள்ளதாக அரசு தரப்பில் தெரிவிக்கப்பட்டது. இருப்பினும், மாநிலம் கடுமையான நிதி நெருக்கடியில் இருக்கும் சூழலில், மக்கள் பணத்தில் மக்கள் பிரதிநிதிகளுக்கு இத்தகைய ஆடம்பர வசதிகள் தேவையா என்ற கேள்வி அரசியல் வட்டாரத்தில் மிகப்பெரிய காரசார விவாதத்தை தோற்றுவித்துள்ளது.
இந்த அறிவிப்புக்கு எதிர்ப்பு தெரிவித்து, எதிர்க்கட்சித் தலைவர் உதயநிதி ஸ்டாலின் தலைமையில் தி.மு.க சட்டமன்ற உறுப்பினர்கள் 59 பேரும் இந்த இலவச காரை ஏற்கப்போவதில்லை என அதிகாரப்பூர்வமாக அறிவித்தனர். “மாநிலத்தின் கடன் சுமையைக் சுட்டிக்காட்டி பல்வேறு மக்கள் நலத்திட்டங்களுக்கு நிதி நெருக்கடி என்று கூறும் அரசு, மக்கள் பிரதிநிதிகளுக்கு கோடிக்கணக்கில் செலவிடுவது எந்த வகையில் நியாயம்?” என்று எதிர்க்கட்சி கடுமையாகக் சாடியது. மேலும், வசதியான மற்றும் பெரும் கோடீஸ்வரர்களாக இருக்கும் எம்.எல்.ஏ-க்களுக்கு மக்கள் வரிப்பணத்தில் இருந்து கார் வழங்குவதை விட, கஷ்டப்படும் விவசாயிகளுக்கு நிதியுதவியோ அல்லது கடன் தள்ளுபடியோ வழங்கிிருக்கலாம் என்ற குற்றச்சாட்டும் முன்வைக்கப்பட்டது.
எதிர்க்கட்சிகளின் விமர்சனங்களுக்குப் பதிலளித்த ஆளும் தமிழக வெற்றிழக (TVK) அமைச்சர்கள் மற்றும் ஆதரவு உறுப்பினர்கள், இது ஆடம்பர வசதி அல்ல என்றும், 3 லட்சத்திற்கும் அதிகமான மக்களைச் சந்தித்து களப்பணியாற்ற உதவும் அடிப்படைத் தேவை என்றும் வாதிட்டனர். ஏழை மற்றும் முதல்முறை எம்.எல்.ஏ-க்கள் நேர்மையாக, யாரிடமும் கையேந்தாமல் மக்கள் பணியாற்றவே இத்திட்டம் கொண்டுவரப்பட்டது என அரசு தரப்பு நியாயப்படுத்தியது. இருப்பினும், ஏற்கனவே பல கோடி ரூபாய் சொத்து மதிப்புள்ள எம்.எல்.ஏ-க்களும் அரசின் இலவச காரைக் கேட்பது பெரும் சர்ச்சையை ஏற்படுத்தியுள்ளது.
மக்கள் நல திட்டங்களுக்கு நிதி பற்றாக்குறை நிலவும் வேளையில், சட்டமன்ற உறுப்பினர்களுக்கான இந்த ஆடம்பர சலுகை குறித்த விவாதம் சமூக வலைதளங்களிலும், அரசியல் களத்திலும் பெரும் கொந்தளிப்பை ஏற்படுத்தியுள்ளது. மக்கள் பிரதிநிதிகளின் வசதியை விட, நலிவடைந்த விவசாயிகள் மற்றும் பொதுமக்களின் அத்தியாவசிய தேவைகளுக்கே அரசு முன்னுரிமை அளிக்க வேண்டும் என பல்வேறு தரப்பினரும் தொடர்ந்து வலியுறுத்தி வருகின்றனர்
