கர்நாடக மாநிலம் சாம்ராஜ்நகர் மாவட்டம் ஹனூர் வனப்பகுதியில் 3 தமிழர்கள் உயிரிழந்த சம்பவம் தொடர்பாக வெளியாகியுள்ள முதற்கட்ட தடயவியல் தகவல்கள் பெரும் அதிர்ச்சியை ஏற்படுத்தியுள்ளன. ஆகஸ்ட் 15-ஆம் தேதி அதிகாலையில் காவிரி வனவிலங்கு சரணாலயப் பகுதியில் நடைபெற்ற இந்தச் சம்பவத்தில், வனத்துறையினர் மிக அருகில் இருந்து (Close Range) துப்பாக்கியால் சுட்டதாலேயே ஆண்டனி சாமி, ஜான் ரோஸ் பீட்டர் மற்றும் குமார் ஆகிய மூவரும் உயிரிழந்துள்ளனர் என்பது காயங்களின் தன்மைகள் மூலம் தெரியவந்துள்ளது.
வனத்துறையினர் மேற்கொண்ட சோதனையின் போது, ஒரே ஒரு துப்பாக்கியிலிருந்து மட்டுமே மூன்று ரவுண்டுகள் தோட்டாக்கள் பாய்ந்துள்ளன என்பது விசாரணையில் உறுதி செய்யப்பட்டுள்ளது. உயிரிழந்தவர்களின் கழுத்து, நெஞ்சு மற்றும் தொடைப் பகுதிகளில் துப்பாக்கிக் குண்டுகள் மிக நெருக்கமான தொலைவில் இருந்து பாய்ந்ததற்கான காயங்கள் கண்டறியப்பட்டுள்ளன. எதிர்தரப்பில் இருந்து துப்பாக்கிச் சூடு நடத்தப்பட்டதாகக் கூறப்பட்ட போதிலும், வனத்துறைப் பணியாளர் ஒருவரின் துப்பாக்கியிலிருந்து மட்டுமே குண்டுகள் பாய்ந்திருப்பது சந்தேகங்களை தீவிரப்படுத்தியுள்ளது.
காணாமல் போன மாடுகளைத் தேடிச் சென்ற அப்பாவி விவசாயிகளை வனத்துறையினர் கொடூரமாகச் சுட்டுக்கொன்றுவிட்டதாகக் உயிரிழந்தவர்களின் குடும்பத்தினரும் கிராம மக்களும் குற்றம்சாட்டி வருகின்றனர். அதேவேளையில், வன விலங்குகளை வேட்டையாட வந்த கும்பலைத் தற்காப்பிற்காகச் சுட்டதாகக் கர்நாடக வனத்துறை வாதிடுகிறது. இருவேறு முரண்பட்ட தகவல்கள் எழுந்துள்ள நிலையில், இச்சம்பவம் குறித்து விரிவான நீதி விசாரணைக்கு (Magisterial Inquiry) கர்நாடக அரசு உத்தரவிட்டுள்ளது.
தமிழகத்தைச் சேர்ந்த 3 பேர் சுட்டுக்கொல்லப்பட்ட இச்சம்பவத்திற்குக் கடும் கண்டனம் தெரிவித்துள்ள தமிழ்நாடு முதலமைச்சர் சி. ஜோசப் விஜய், இப்படுகொலை குறித்து சிபிஐ (CBI) அல்லது உயர்நிலைக் குழு அமைத்து நடுநிலையான விசாரணை நடத்தப்பட வேண்டும் என வலியுறுத்தியுள்ளார். தடயவியல் அறிக்கைகள் வெளியாகி வருவதைத் தொடர்ந்து, எல்லைப் பகுதியில் பதற்றமான சூழல் நிலவி வருவதால் பலத்த போலீஸ் பாதுகாப்பு போடப்பட்டுள்ளது.
