புதுச்சேரியில் இருசக்கர வாகன ஓட்டிகளுக்குக் கட்டாய ஹெல்மெட் விதியை அம்மாநில போக்குவரத்து மற்றும் சட்டம் ஒழுங்கு காவல்துறை தீவிரமாக அமல்படுத்தி வருகிறது. இந்நிலையில், புதுச்சேரி சட்டமன்றக் கூட்டத்தொடரில் பங்கேற்பதற்காகக் ஆளும் கட்சியின் சட்டப்பேரவை உறுப்பினர் ஒருவர் ஹெல்மெட் அணியாமல் தனது ஸ்கூட்டரில் சட்டமன்றத்திற்கு வந்த சம்பவம் பெரும் பரபரப்பை ஏற்படுத்தியதுடன், அவருக்குப் போக்குவரத்துப் போலீசார் அபராதம் விதித்துள்ள சம்பவம் வெளிச்சத்திற்கு வந்துள்ளது.
புதுச்சேரி அரசு அண்மையில் ஹெல்மெட் அணியாமல் இருசக்கர வாகனம் ஓட்டுபவர்களுக்கு ரூ.1,000 வரை அபராதம் விதிக்கும் நடைமுறையைத் தீவிரப்படுத்தியது. காவல்துறையின் இந்த அதிரடி நடவடிக்கையால் தினசரி ஆயிரக்கணக்கான பொதுமக்கள் அபராதம் செலுத்தி வரும் நிலையில், அரசின் இந்த நடவடிக்கைக்கு பொதுமக்கள் மற்றும் வணிகர்களிடையே எதிர்ப்புகளும் கிளம்பின. பொதுமக்கள் மீது மட்டும் தீவிரமாகக் கெடுபிடி காட்டும் காவல்துறை, அதிகாரிகளிடமும் அரசியல்வாதிகளிடமும் இதே விதியை நடைமுறைப்படுத்துகிறதா என்ற கேள்வி எழுந்தது.
சட்டமன்ற வளாகத்திற்கு அருகே பாதுகாப்புப் பணியில் ஈடுபட்டிருந்த போக்குவரத்துப் காவல்துறையினர், ஹெல்மெட் அணியாமல் ஸ்கூட்டரில் வந்த ஆளும் கட்சி எம்.எல்.ஏ-வை இடைமறித்து அவருக்கும் விதிகளின்படி அபராதச் சலான் வழங்கினர். “சட்டத்தின் முன் அனைவரும் சமம்; மக்கள் பிரதிநிதிகளாக இருந்தாலும் போக்குவரத்து விதிகளை மீறினால் நடவடிக்கை நிச்சயம் உண்டு” என்பதை உணர்த்தும் வகையில் காவல்துறையினர் இந்த நடவடிக்கையை மேற்கொண்டனர். அபராதத்தைப் பெற்றுக்கொண்ட எம்.எல்.ஏ-வும் சலான் தொகையைச் செலுத்த ஒப்புக்கொண்டார்.
இருப்பினும், பொதுமக்கள் மத்தியில் விழிப்புணர்வை ஏற்படுத்தாமல் திடீரென அதிக அபராதம் வசூலிப்பது சரியல்ல என்பதை உணர்த்தவே, தாம் ஹெல்மெட் அணியாமல் வந்து அதிகாரிகளின் கவனத்திற்கு இந்த விவகாரத்தைக் கொண்டு சென்றதாக அந்த எம்.எல்.ஏ தரப்பில் பின்னணியாகத் தெரிவிக்கப்படுகிறது. மக்கள் பிரதிநிதி ஒருவருக்கே போக்குவரத்துப் போலீசார் அபராதம் விதித்த இந்தச் சம்பவம் புதுச்சேரி அரசியல் வட்டாரத்திலும் பொதுமக்கள் மத்தியிலும் தற்போது வைரலாக விவாதிக்கப்பட்டு வருகிறது.
