இந்தியாவில் நடைபெறும் 18-வது பிரிக்ஸ் (BRICS) உச்சிமாநாட்டில் பங்கேற்பதற்காக ரஷ்ய அதிபர் விளாடிமிர் புடின் புதுடெல்லி வந்தடைந்த நிலையில், பாரத் மண்டபத்தில் பிரதமர் நரேந்திர மோடியை நேரில் சந்தித்து இருதரப்பு உயர்மட்ட ஆலோசனைகளில் ஈடுபட்டுள்ளார்.
டெல்லி பாரத் மண்டபத்திற்கு வருகை தந்த அதிபர் புடினைப் பிரதமர் மோடி கைகுலுக்கி அன்போடு வரவேற்றார். இந்தச் சந்திப்பின் போது, தமிழ் செவ்வியல் இலக்கியத்தின் உச்சமாகக் கருதப்படும் ‘திருக்குறள்’ புத்தகத்தின் ரஷ்ய மொழிபெயர்ப்புப் பதியை அதிபர் புடினுக்குப் பிரதமர் மோடி பரிசாக வழங்கினார். 2026-ஆம் ஆண்டிற்கான பிரிக்ஸ் அமைப்பின் தலைமைப் பொறுப்பை இந்தியா ஏற்று நடத்தி வரும் சூழலில், இம்மாநாடு சர்வதேச அளவில் பெரும் முக்கியத்துவம் பெற்றுள்ளது.
இவர்களது சந்திப்பில், 2030-ஆம் ஆண்டிற்குள் இருநாடுகளுக்கு இடையிலான வர்த்தகத்தை 100 பில்லியன் டாலராக உயர்த்தும் திட்டம், சிவில் அணுசக்தி, பாதுகாப்புத் துறை ஒத்துழைப்பு, உரம் மற்றும் கனிம வளங்கள் குறித்த பல முக்கிய ஒப்பந்தங்கள் விவாதிக்கப்பட்டன. மேலும், உக்ரைன்-ரஷ்யா இடையிலான அமைதிப் பேச்சுவார்த்தைகள் மற்றும் வர்த்தகப் பரிவர்த்தனைகள் குறித்தும் இரு தலைவர்களும் விரிவாக ஆலோசனை நடத்தினர்.
செப்டம்பர் 12 மற்றும் 13 ஆகிய தேதிகளில் நடைபெறவுள்ள இந்த பிரிக்ஸ் உச்சிமாநாட்டில் சீன அதிபர் ஷி ஜின்பிங், ஈரானிய அதிபர் மசூத் பெசெஷ்கியான் உள்ளிட்ட பல உலக நாடுகளின் தலைவர்களும் பங்கேற்றுள்ளனர். உலகப் பொருளாதாரம் மற்றும் பிராந்திய பாதுகாப்பு குறித்த முக்கிய முடிவுகள் இம்மாநாட்டில் எட்டப்படும் என எதிர்பார்க்கப்படுகிறது.
