வடமேற்கு பிரான்ஸின் நார்மண்டி பிராந்தியத்தில் 186 பயணிகளுடன் சென்று கொண்டிருந்த பயணியர் ரயில் திடீரெனத் தடம்புரண்டு விபத்துக்குள்ளானதில் 44 பேர் காயமடைந்துள்ளனர். தண்டவாளத்தில் இரும்புத் துண்டு ஒன்று கண்டெடுக்கப்பட்டதைத் தொடர்ந்து, இந்த விபத்தின் பின்னணியில் திட்டமிட்ட சதிச் செயல் (Sabotage) இருக்கலாம் என்ற கோணத்தில் பிரெஞ்சு புலனாய்வுத் துறையினரும் பொலிஸாரும் தீவிர விசாரணை மேற்கொண்டு வருகின்றனர்.
ரூவன் (Rouen) நகரிலிருந்து கேன் (Caen) நகரை நோக்கிச் சென்ற பிராந்திய ரயில், கிளியோன் (Cléon) பகுதி அருகே சென்று கொண்டிருந்த போது அதன் 5 பெட்டிகள் தண்டவாளத்தை விட்டு விலகியதில் ஒரு பெட்டி பக்கவாட்டில் சாய்ந்து விபத்துக்குள்ளானது. வெள்ளிக்கிழமை இரவு 7:45 மணியளவில் நடந்த இந்தச் சம்பவத்தைத் தொடர்ந்து அவசரகால மீட்புத் திட்டம் அமல்படுத்தப்பட்டு, 130 தீயணைப்பு வீரர்கள், 5 மருத்துவக் குழுக்கள் மற்றும் 80 மீட்பு வாகனங்கள் சம்பவ இடத்திற்கு விரைந்து பணிகளை மேற்கொண்டன.
விபத்தில் காயமடைந்த 44 பேரில் ஆபத்தான நிலையிலிருந்த 18 வயது இளம் பெண் ஒருவர் ஹெலிகாப்டர் மூலம் மருத்துவமனைக்குக் கொண்டு செல்லப்பட்டுத் தீவிர சிகிச்சை அளிக்கப்பட்டு வருகிறார். தண்டவாளத்தின் மீது ரயில் இரும்புப் பகுதி ஒன்று கண்டெடுக்கப்பட்டதால், யாரேனும் துரோகச் சிந்தனையோடு திட்டமிட்டு இந்தத் தடங்கலை ஏற்படுத்தினார்களா என்ற சந்தேகத்தில் ரூவன் அரசு வழக்கறிஞர் செபாஸ்டியன் கல்லோயிஸ் தலைமையிலான குழுவினர் விசாரணையைத் தீவிரப்படுத்தியுள்ளனர். ரயில் ஓட்டுநரிடம் நடத்தப்பட்ட மது மற்றும் போதைப்பொருள் பரிசோதனையில் அவர் தவறு செய்யவில்லை என்பது உறுதி செய்யப்பட்டுள்ளது.
ரயிலின் வேகக் கட்டுப்பாட்டுப் பெட்டி (Black Box) கைப்பற்றப்பட்டு ஆய்வு செய்யப்பட்டு வரும் வேளையில், தண்டவாளச் சீரமைப்புப் பணிகளுக்காக ரூவன் – கேன் இடையேயான ரயில் போக்குவரத்து தற்காலிகமாக நிறுத்தப்பட்டுப் மாற்றுப் பேருந்துகள் இயக்கப்பட்டு வருகின்றன. பிரான்ஸில் சமீபகாலமாக உள்கட்டமைப்புகளைக் குறிவைத்து நடத்தப்படும் சதி முயற்சிகள் அதிகரித்து வரும் சூழலில், இந்த ரயில் விபத்து அந்நாட்டு மக்களிடையே பெரும் அதிர்ச்சியையும் பாதுகாப்புக் கவலையையும் ஏற்படுத்தியுள்ளது.
