பூமியின் சுற்றுப்பாதையில் (Earth’s Orbit) தங்களின் தாக்கும் திறன் கொண்ட தாக்குதல் ஆயுதங்கள் மற்றும் வான் பாதுகாப்பு அமைப்புகளை முதன்முறையாக நிலைநிறுத்தியுள்ளதை அமெரிக்க விண்வெளிப் படை (US Space Force) அதிகாரப்பூர்வமாக உறுதிப்படுத்தியுள்ளது. மேலைநாடுகளுக்கு எதிரான அச்சுறுத்தல்கள் அதிகரித்து வரும் சூழலில், அமெரிக்காவின் இந்த அதிரடி அறிவிப்பு சர்வதேச அளவில் புதிய விண்வெளிப் போட்டிக்கு வழிவகுத்துள்ளது.
மேரிலேண்டில் நடைபெற்ற ‘விண்வெளி மற்றும் இணையப் பாதுகாப்பு மாநாட்டில்’ (Air, Space & Cyber Conference) உரையாற்றிய அமெரிக்க விமானப்படைச் செயலாளர் டிராய் மேங்க் (Troy Meink), “எதிரி நாடுகளிடமிருந்து அமெரிக்க மற்றும் நட்பு நாடுகளின் கூட்டுப் படைகளைப் பாதுகாப்பதற்காக, தாக்கும் திறன் கொண்ட ‘ஸ்பேஸ் கன்ட்ரோல்’ ஆயுதங்களை (Space-Control Weapons) அமெரிக்கா விண்வெளியில் வெற்றிகரமாக நிலைநிறுத்தியுள்ளது” எனத் தெரிவித்தார். இருப்பினும், விண்வெளியில் நிலைநிறுத்தப்பட்டுள்ள ஆயுதத்தின் வகை, அதன் எண்ணிக்கை மற்றும் எப்போது விண்ணுக்கு அனுப்பப்பட்டது போன்ற ரகசிய விவரங்களை வெளிப்படுத்த அவர் மறுத்துவிட்டார்.
சீனா மற்றும் ரஷ்யா ஆகிய நாடுகள் விண்வெளித் தொழில்நுட்பத்தை ராணுவப் பயன்பாட்டிற்கு அதிவேகமாக மாற்றி வருவதாலும், அமெரிக்காவின் செயற்கைக்கோள்களைச் செயலிழக்கச் செய்யும் முயற்சியில் ஈடுபட்டு வருவதாலுமே இந்தத் தற்காப்பு நடவடிக்கை எடுக்கப்பட்டுள்ளதாக வாஷிங்டன் தெரிவித்துள்ளது. இந்த ஆயுதங்கள் எதிரிகளின் செயற்கைக்கோள்கள் மற்றும் விண்வெளி மையங்களைக் கதிர்வீச்சு மூலம் செயலிழக்கச் செய்யும் அல்லது நேரடியாக அழிக்கும் (Kinetic & Non-Kinetic) திறன் கொண்டவை என அமெரிக்க விண்வெளிப் படை விளக்கம் அளித்துள்ளது.
1967-ஆம் ஆண்டின் சர்வதேச விண்வெளி ஒப்பந்தத்தின்படி (Outer Space Treaty) விண்வெளியில் அணுஆயுதங்கள் மற்றும் பேரழிவு ஆயுதங்களை வைப்பதற்குத் தடை விதிக்கப்பட்டிருந்தாலும், வழக்கமான ராணுவத் தாக்குதல் அமைப்புகளைப் பயன்படுத்துவதற்குத் தடையில்லை என்பதை அமெரிக்கா சுட்டிக்காட்டியுள்ளது. அமெரிக்காவின் இந்த அறிவிப்பிற்குச் சீனா கடும் எதிர்ப்பு தெரிவித்துள்ளதோடு, “விண்வெளியைப் போர்க்களமாக்கும் நடவடிக்கைகளை வாஷிங்டன் உடனடியாக நிறுத்த வேண்டும்” எனக் கோரிக்கை விடுத்துள்ளது. அமெரிக்காவின் இந்த நகர்வு விண்வெளிப் பாதுகாப்பு சமநிலையை மாற்றி அமைத்துள்ளதால் சர்வதேச வல்லரசு நாடுகளிடையே புதிய பதற்றம் உருவாகியுள்ளது.
