செங்கடல் மற்றும் சர்வதேசக் கடல் பகுதிகளில் அமைந்துள்ள அதிமுக்கியக் கடலடி இணையக் கேபிள்கள் மற்றும் மின்சார உள்கட்டமைப்புகளை இலக்கு வைத்து யேமனின் ஹூதி கிளர்ச்சியாளர்கள் தாக்குதல் நடத்த திட்டமிட்டுள்ளதாகப் பாதுகாப்பு வல்லுநர்கள் எச்சரிக்கை விடுத்துள்ளதுடன், இதனால் பிரிட்டன் மாபெரும் மின்சார மற்றும் இணையச் சேவைகளின் முடக்கத்தை எதிர்கொள்ளக்கூடும் எனத் தெரிவித்துள்ளனர்.
செங்கடல் பகுதியில் வணிகக் கப்பல்கள் மீது தொடர் ட்ரோன் மற்றும் ஏவுகணைத் தாக்குதல்களை நடத்தி வரும் ஹூதி அமைப்பு, தற்போது தங்களின் கவனத்தைக் கடலடி உள்கட்டமைப்புகளின் பக்கம் திருப்பி வருவதாகப் பாதுகாப்புத் துறை அறிக்கைகள் தெரிவிக்கின்றன. ஆசியா மற்றும் ஐரோப்பாவை இணைக்கும் 90 சதவீதத்திற்கும் அதிகமான இணையத் தரவுப் பரிமாற்றங்கள் செங்கடல் வழியே செல்லும் கடலடி கேபிள்கள் மூலமாகவே நடைபெறுகின்றன.
இத்தகைய கடலடி வடங்கள் துண்டிக்கப்பட்டால், பிரிட்டனின் நிதிச் சந்தைகள், இணையச் சேவைகள், மின் விநியோகக் கட்டமைப்புகள் மற்றும் வங்கி பரிவர்த்தனைகள் அனைத்தும் ஒரே நேரத்தில் முற்றிலும் முடங்கும் அபாயம் உள்ளது. இதை ‘கற்காலத்திற்குத் தள்ளும் இருட்டடிப்பு’ (Stone Age Blackout) எனக் குறிப்பிடும் ராணுவ நிபுணர்கள், பிரிட்டன் மற்றும் மேலைநாடுகளின் பொருளாதாரத்தின் அடிப்படையையே தகர்க்க இத்தகைய சதித் திட்டங்கள் தீட்டப்பட்டு வருவதாகத் தெரிவித்துள்ளனர்.
இதையடுத்து, செங்கடல் மற்றும் வட அட்லாண்டிக் கடல் பகுதிகளில் பாயும் கடலடி உள்கட்டமைப்புகளைப் பாதுகாக்க நேட்டோ நாடுகளும் பிரிட்டன் கடற்படையும் தங்களின் நீர்மூழ்கிக் கப்பல்கள் மற்றும் ரோந்து கப்பல்களின் கண்காணிப்பைத் தீவிரப்படுத்தியுள்ளன. செங்கடலில் அதிகரித்து வரும் இந்த புதிய வடிவிலான கடலடி அச்சுறுத்தல் சர்வதேசப் பாதுகாப்பு வட்டாரங்களில் பெரும் கவலையை ஏற்படுத்தியுள்ளது.
