பெருநகர சென்னை மாநகராட்சியில் பணிபுரியும் தூய்மைப் பணியாளர்களுக்கு வழங்கப்பட்டு வந்த இலவசச் சமைத்த உணவிற்குப் பதிலாக, இனி நேரடியாக அவர்களது வங்கிக் கணக்கிலேயே உணவுப்படியை (Food Allowance) ரொக்கமாக வழங்கிட வழிவகை செய்யும் முக்கிய அரசாணையைத் தமிழக அரசு அதிகாரப்பூர்வமாக வெளியிட்டுள்ளது.
சென்னை மாநகராட்சியில் ஆயிரக்கணக்கான தூய்மைப் பணியாளர்கள் தினமும் அதிகாலை முதலே சுழற்சி முறையில் தூய்மைப் பணிகளில் ஈடுபட்டு வருகின்றனர். இவர்களுக்கு அம்மா உணவகங்கள் மற்றும் ஒப்பந்த உணவகங்கள் மூலமாக உணவு வழங்கப்பட்டு வந்தது. இருப்பினும், பணி நேர மாறுதல்கள் மற்றும் உணவின் தரம் தொடர்பான புகார்கள் காரணமாகப் பல பணியாளர்களால் முழுமையாக இந்த உணவைப் பயன்படுத்த முடியாத சூழல் நிலவி வந்தது.
இதனைக் கருத்தில் கொண்டு, சமைத்த உணவை வழங்குவதற்குப் பதிலாகத் தினமும் குறிப்பிட்ட தொகையை உணவுக் படியாகப் பணியாளர்களின் கணக்கிலேயே நேரடியாக வழங்க வேண்டும் எனத் தூய்மைப் பணியாளர்கள் சங்கம் சார்பில் தொடர்ச்சியாகக் கோரிக்கைகள் முன்வைக்கப்பட்டு வந்தன. இக்கோரிக்கையை ஏற்று பரிசீலித்த தமிழக நகராட்சி நிர்வாகம் மற்றும் குடிநீர் வழங்கல் துறை, தற்போது அதற்கான அரசாணையை (G.O.) முறைப்படி பிறப்பித்துள்ளது.
இந்த புதிய அரசாணையின்படி, சென்னை மாநகராட்சியின் அனைத்து மண்டலங்களிலும் பணிபுரியும் நிரந்தர மற்றும் ஒப்பந்தத் தூய்மைப் பணியாளர்களுக்கு அவர்களின் பணிக்கால நாட்களுக்கு ஏற்ப உணவுப்படி கணக்கிடப்பட்டு மாதச் சம்பளத்துடன் சேர்த்து வழங்கப்படும். அரசின் இந்த அதிரடி நடவடிக்கையால் தங்களின் விருப்பத்திற்கேற்ப சுகாதாரமான உணவை உட்கொள்ள முடியும் எனச் சென்னை மாநகராட்சி தூய்மைப் பணியாளர்கள் மகிழ்ச்சியும் நன்றியும் தெரிவித்துள்ளனர்.
