கடந்த திமுக ஆட்சிக் காலத்தில் நெடுஞ்சாலைத் துறையில் பல்வேறு முறைகேடுகள் நடைபெற்றுள்ளதாகத் தமிழ்நாடு அமைச்சர் ஆதவ் அர்ஜுனா பரபரப்பு குற்றச்சாட்டை முன்வைத்துள்ளார். சென்னையில் செய்தியாளர்களைச் சந்தித்த அவர், தேர்தல் நடைபெற்ற ஆண்டில் மட்டும் நெடுஞ்சாலைகளில் மேற்கொள்ளப்பட்ட ‘பேட்ச் வொர்க்’ (Patch work) எனப்படும் சாலைப் பழுதுபார்ப்புப் பணிகளுக்காக ரூ.2,000 கோடி அளவுக்கு ஊழல் செய்யப்பட்டுள்ளதாகத் தெரிவித்தார். இந்த முறைகேடுகள் தொடர்பாகத் அரசு சார்பில் விரைவில் விரிவான வெள்ளை அறிக்கை வெளியிடப்படும் என்றும் அவர் உறுதி அளித்தார்.
விதிமுறைகளின்படி ரூ.10 லட்சத்திற்கு மேல் திட்ட மதிப்பீடு இருந்தால் திறந்தநிலை டெண்டர் கோரப்பட வேண்டும் என்பதால், முறைகேடுகளை மறைக்கத் திட்ட மதிப்பீடுகள் ரூ.10 லட்சத்திற்குள்ளாகவே பிரிக்கப்பட்டதாக அவர் கூறினார். உண்மையான ஒப்பந்ததாரர்கள் இன்றிப் போலியான நபர்களின் பெயர்களைப் பயன்படுத்தி இந்த நிதி கைமாற்றப்பட்டுள்ளதாகச் சுட்டிக்காட்டினார். முன்னாள் அமைச்சர் எ.வ.வேலு வகித்து வந்த இத்துறையில் சட்டப்பேரவை நிதி அனுமதியின்றி முன்னதாகவே பணி ஆணைகள் வழங்கப்பட்டதாகவும் அவர் சாடினார்.
மக்கள் பணத்தைச் சுரண்டித் தேர்தலில் முறைகேடு செய்யப் பயன்படுத்தியவர்கள் மீது சட்டப்படி கடும் நடவடிக்கை எடுக்கப்படும் என அமைச்சர் ஆதவ் அர்ஜுனா சுட்டிக்காட்டினார். வெளிப்படைத்தன்மையான நிர்வாகத்தை வழங்க அரசு முயன்று வரும் சூழலில், துறைவாரியாக ஆய்வுகள் மேற்கொள்ளப்பட்டு முறைகேடுகள் வெளிக்கொணரப்படும் எனக் குறிப்பிட்டார்.
நெடுஞ்சாலைத்துறை தொடர்பான வெள்ளை அறிக்கை தயாரிக்கும் பணிகள் முடுக்கிவிடப்பட்டுள்ளதால், அடுத்தகட்டமாகச் சட்ட நடவடிக்கைகள் தீவிரமடையும் என எதிர்பார்க்கப்படுகிறது.
இப்புகார்கள் குறித்து முந்தைய ஆளுங்கட்சியின் முன்னாள் அமைச்சர்கள் அளிக்கும் பதில்கள் அரசியல் களத்தில் முக்கிய கவனத்தைப் பெற்றுள்ளன.
