தமிழ்நாட்டில் காலியாக உள்ள அம்பாசமுத்திரம் உள்ளிட்ட 5 சட்டசபை தொகுதிகளுக்கான இடைத்தேர்தல் களம் சூடுபிடித்துள்ள நிலையில், அம்பாசமுத்திரம் தொகுதியில் நாம் தமிழர் கட்சி சார்பில் தலைமை ஒருங்கிணைப்பாளர் சீமான் நேரில் போட்டியிடுகிறார். திருநெல்வேலியில் செய்தியாளர்களைச் சந்தித்த சீமான், பிற கட்சிகளின் ஆதரவு கிடைத்தாலும் அதை ஏற்கத் தயார் எனக் கூறி இந்த அறிவிப்பை வெளியிட்டார். அதிமுக எம்.எல்.ஏவாக இருந்த இசக்கி சுப்பையா தவெகவில் இணைவதற்காகத் தனது பதவியை ராஜினாமா செய்ததை அடுத்து அம்பாசமுத்திரம் தொகுதி காலியானது.
சீமான் இந்தத் தொகுதியைத் தேர்வு செய்ததன் பின்னணியில் இரண்டு முக்கிய காரணங்கள் இருப்பதாக அரசியல் வட்டாரங்கள் தெரிவிக்கின்றன. சட்டமன்றத்தில் சௌமியா அன்புமணி மற்றும் பிரேமலதா விஜயகாந்த் போன்ற பெண் தலைவர்கள் குரல் கொடுத்து வரும் சூழலில், மக்கள் பிரச்சனைகளுக்காகச் சட்டமன்றத்திற்குள் சென்று தனது குரலை எதிரொலிக்க வேண்டும் என்ற எண்ணம் முதன்மை காரணமாகப் பார்க்கப்படுகிறது. மேலும், கடலூர், திருவொற்றியூர் மற்றும் காரைக்குடி ஆகிய தொகுதிகளில் தொடர்ந்து போட்டியிட்டு வந்த சீமான், இம்முறை தென் மண்டலத்தில் தனது கட்சியின் வாக்கு வங்கியையும் கள பலத்தையும் நிரூபிக்க இத்தொகுதியைத் தேர்ந்தெடுத்துள்ளார்.
சீமானின் இந்த அறிவிப்பு குறித்துப் பேசிய திமுக தலைவர் மு.க.ஸ்டாலின், தேர்தல் தேதி அதிகாரப்பூர்வமாக அறிவிக்கப்பட்ட பிறகே கட்சியின் நிலைப்பாடு குறித்து முடிவு செய்யப்படும் எனத் தெரிவித்துள்ளார். மற்ற திராவிட மற்றும் தேசியக் கட்சிகள் தங்களுக்கு ஆதரவு அளித்தால் அதை வரவேற்பதாகச் சீமான் கூறிய கருத்து தமிழக அரசியலில் பெரும் விவாதத்தை உருவாக்கியுள்ளது. உறமுறைகள் வேறு, அரசியல் வேறு என்றும், எதிர்த்துப் போட்டியிடும் வேட்பாளர்கள் யாராக இருந்தாலும் களம் காண்பேன் என்றும் அவர் திட்டவட்டமாகக் கூறியுள்ளார்.
தற்போது நாம் தமிழர் கட்சியினர் அம்பாசமுத்திரம் தொகுதியில் தேர்தல் பிரச்சாரப் பணிகளைத் தொடங்குவதற்கான முதற்கட்ட ஏற்பாடுகளைச் செய்து வருகின்றனர்.
வரும் நவம்பர் 27-ஆம் தேதி அம்பாசமுத்திரத்தில் பிரமாண்ட பொதுக்கூட்டம் நடத்தப்பட்டுச் சீமானின் தேர்தல் பிரச்சாரம் முறைப்படி தொடங்கப்பட உள்ளது.
