முன்னாள் அமைச்சர் கே.என்.நேருவுக்குச் சொந்தமான இடங்களில் நடைபெற்ற லஞ்ச ஒழிப்புத்துறை சோதனையைத் தொடர்ந்து, சில சின்னத்திரை நடிகைகள் அரசியல்வாதிகளின் பணத்தை வெள்ளையாக மாற்றித் தருவதாகச் சமூக வலைதளங்களில் அவதூறுகள் பரவின. குறிப்பாகச் சின்னத்திரை நடிகைகளான ஜனனி அசோக் குமார் மற்றும் ஷபானா ஆகியோரின் பெயர்களைக் குறிப்பிட்டுக் குற்றச்சாட்டுகள் பகிரப்பட்டு வந்தன. இந்தச் சமூக வலைதள வதந்திகள் குறித்துத் தெரிவித்த நடிகைகள் இருவரும், தங்களுக்கு அரசியலுக்கும் எந்தத் தொடர்பும் இல்லை எனத் திட்டவட்டமாக மறுத்துள்ளனர்.
இது குறித்து விளக்கம் அளித்துள்ள நடிகை ஜனனி அசோக் குமார், தான் எந்தவொரு அரசியல் கட்சியுடனும் தொடர்பில்லாதவர் என்றும், சமூக வலைதளங்களில் பரவும் தகவல்கள் முற்றிலும் பொய்யானவை என்றும் தெரிவித்துள்ளார். தான் கஷ்டப்பட்டு உழைத்து வரும் நிலையில், ஆதாரமற்ற குற்றச்சாட்டுகள் தன்னை மிகவும் பாதிப்பதாக அவர் குறிப்பிட்டுள்ளார். இதேபோல், நடிகை ஷபானாவும் சில சமூக வலைதளப் பக்கங்கள் மற்றும் மீம் பக்கங்கள் மூலம் வேண்டுமென்றே அவதூறு பரப்பப்பட்டுள்ளதாகத் தெரிவித்துள்ளார். தங்களை எந்தவொரு காவல்துறை அதிகாரியும் விசாரணைக்காக அழைக்கவில்லை என்றும், தாங்கள் சம்பந்தப்படாத விவகாரத்தில் பெயர் அடிபடுவதாகக் கூறியுள்ளார்.
இந்த விவகாரம் குறித்துக் கருத்து தெரிவித்த நடிகைகள், வதந்திகளைத் தொடர்ந்து பரப்பும் நபர்கள் மீதும் நிறுவனங்கள் மீதும் சட்டப்பூர்வமான அவதூறு வழக்கு (Defamation case) தொடரப்படும் என எச்சரித்துள்ளனர். தாங்கள் கடின உழைப்பால் மட்டுமே வாழ்ந்து வருவதாகவும், அரசியல் தலைவர்கள் யாருடனும் தங்களுக்கு எந்தத் தொடர்பும் இல்லை எனவும் அவர்கள் மீண்டும் தெளிவுபடுத்தியுள்ளனர்.
தற்போது சம்பந்தப்பட்ட நடிகைகள் ஊடகங்கள் வாயிலாகவும் தங்களது சமூக வலைதளப் பக்கங்கள் மூலமாகவும் இந்த வதரிகளுக்கு அதிகாரப்பூர்வ மறுப்பைப் பதிவு செய்துள்ளனர்.
இதுகுறித்து அவர்கள் சென்னை திரும்பியவுடன் தங்களது வழக்கறிஞர்களுடன் பேசி அடுத்தகட்டச் சட்ட நடவடிக்கைகளை மேற்கொள்ளத் திட்டமிட்டுள்ளனர்.
