அமெரிக்காவில் இடைத்தேர்தல் நடைபெறவுள்ள சூழலில், ஹார்முஸ் ஜலசந்தியில் அமைந்துள்ள இரானின் முக்கியக் தீவான கெஷ்ம் (Qeshm Island) மீது அமெரிக்க ராணுவம் தாக்குதல்களை நடத்தியுள்ளது. இரானின் அரசு செய்தி நிறுவனமான ஐஆர்என்ஏ (IRNA), கெஷ்ம் தீவுப் பகுதியில் ஐந்து தொடர் சக்திவாய்ந்த வெடிச்சப்தங்கள் கேட்டதாகவும், இரண்டு போர் விமானங்கள் அப்பகுதியில் பறந்ததை மக்கள் பார்த்ததாகவும் செய்தி வெளியிட்டுள்ளது. அமெரிக்கா தனது முக்கிய ராணுவ நடவடிக்கைகளை மீண்டும் தொடங்குவதாகக் காட்டிக் கொள்ளாமல் இருக்கவே, கடந்த சில வாரங்களாக இதுபோன்ற சிறிய அளவிலான தாக்குதல்களை ரகசியமாக நடத்தி வருவதாகக் கூறப்படுகிறது.
ஹார்முஸ் ஜலசந்திப் பகுதியில் அமெரிக்க வான் மற்றும் கடல்வழிப் சொத்துகள் மீது மேற்பரப்பில் இருந்து வான்நோக்கி ஏவுகணைகளை வீச முயன்ற இரானிய இலக்குகளைக் குறிவைத்தே இந்தத் தாக்குதல் நடத்தப்பட்டதாக அமெரிக்க அதிகாரி ஒருவர் தெரிவித்துள்ளார். ஹார்முஸ் ஜலசந்தியில் சர்வதேச வர்த்தகக் கப்பல்கள் தடையின்றிப் பயணிப்பதை உறுதி செய்யவும், இரானியப் படைகளைத் தடுக்கும் நோக்கில் தற்காப்பு நடவடிக்கையாகவே இது மேற்கொள்ளப்பட்டதாகச் சுட்டிக்காட்டப்பட்டுள்ளது. அதேவேளையில், அமெரிக்க மத்திய கட்டளையகம் (CENTCOM) இச்சம்பவம் தொடர்பாக உடனடியாக அதிகாரப்பூர்வக் கருத்து எதுவும் தெரிவிக்கவில்லை.
முன்னதாக இடைத்தேர்தலுக்கு முன்பாக இரான் மீது புதிய பெரிய அளவிலான ராணுவத் தாக்குதல்கள் நடத்தப்பட மாட்டாது என அமெரிக்க அதிபர் டொனால்ட் டிரம்ப் தெரிவித்திருந்தார். ஆனால், இரானுடன் தூதரக வழியிலான அமைதிப் பேச்சுவார்த்தைகள் ஒருபுறம் நடைபெற்று வரும் போதே, அமெரிக்கா தனது தாக்குதல்களைத் தொடர்வது அப்பகுதியில் பெரும் பரபரப்பை ஏற்படுத்தியுள்ளது.
தற்போது அமெரிக்க வெளியுறவுத் துறை மற்றும் மத்திய கிழக்கு பிராந்தியத்திற்கான தூதரக அதிகாரிகள் நிலைமையைக் கூர்ந்து கவனித்து வருகின்றனர்.
வரவிருக்கும் நாட்களில் சர்வதேச அமைதிப் பேச்சுவார்த்தைகளின் முன்னேற்றம் மற்றும் இரானின் அடுத்தகட்ட நகர்வுகளைப் பொறுத்தே பிராந்தியத்தின் பாதுகாப்புச் சூழல் அமையும் என எதிர்பார்க்கப்படுகிறது.
