அமெரிக்க அதிபர் டொனால்ட் ட்ரம்ப், தன்னை ஒரு மெசியாவைப் போல (கடவுளின் தூதர்) சித்தரிக்கும் AI புகைப்படத்தைப் பகிர்ந்து சில நாட்களிலேயே, மீண்டும் ஒரு சர்ச்சைக்குரிய புகைப்படத்தைத் தனது ‘ட்ரூத் சோஷியல்’ (Truth Social) பக்கத்தில் பதிவிட்டுள்ளார். இந்தப் புதிய புகைப்படத்தில், இயேசு கிறிஸ்து டொனால்ட் ட்ரம்ப்பை ஆரத்தழுவி இருப்பது போன்றும், இருவரும் கண்களை மூடி அமெரிக்க தேசியக் கொடிக்கு முன்னால் நிற்பது போன்றும் சித்தரிக்கப்பட்டுள்ளது. “தீவிர இடதுசாரி பைத்தியங்களுக்கு இது பிடிக்காமல் போகலாம், ஆனால் இது மிகவும் அழகாக இருப்பதாக நான் நினைக்கிறேன்” என்று ட்ரம்ப் தனது பதிவில் குறிப்பிட்டுள்ளார்.
இதற்கு முன்னதாக, ட்ரம்ப் தன்னை இயேசுவைப் போன்ற உடையில், கைகளில் இருந்து ஒளிக்கதிர்கள் வர நோயாளியை குணப்படுத்துவது போன்ற புகைப்படத்தைப் பகிர்ந்திருந்தார். அந்தப் புகைப்படம் கிறிஸ்தவ அமைப்புகள் மற்றும் அரசியல் தலைவர்கள் மத்தியில் பெரும் கொந்தளிப்பை ஏற்படுத்தியிருந்தது. அமெரிக்க தேசியச் சின்னங்களான சுதந்திர தேவி சிலை மற்றும் கழுகுகள் சூழப்பட்ட அந்தப் புகைப்படம், ட்ரம்ப்பின் அதீத அகங்காரத்தைக் காட்டுவதாகப் பலரும் விமர்சித்திருந்தனர். அந்தச் சர்ச்சை அடங்குவதற்குள், அடுத்த புகைப்படத்தை அவர் வெளியிட்டுள்ளது எரியும் நெருப்பில் எண்ணெயை ஊற்றியது போல அமைந்துள்ளது.
ட்ரம்ப்பின் இந்தப் பதிவுக்குப் பல தரப்பிலிருந்தும் கண்டனங்கள் குவிந்து வருகின்றன. முன்னாள் குடியரசுக் கட்சி உறுப்பினர் மார்ஜோரி டெய்லர் கிரீன் இது குறித்துத் தான் பிரார்த்தனை செய்வதாகக் கூறியுள்ளார். பெர்னி சாண்டர்ஸ் இதைப் ‘பித்துப்பிடித்த மற்றும் அகங்காரமான செயல்’ என்று சாடியுள்ளார். கிறிஸ்தவ ஆர்வலர் சீன் ஃபியூச், “இது எந்த வகையிலும் ஏற்றுக்கொள்ள முடியாதது, உடனடியாக நீக்கப்பட வேண்டும்” என்று எக்ஸ் (X) தளத்தில் பதிவிட்டுள்ளார். பல கிறிஸ்தவ ஊடகவியலாளர்கள் மற்றும் ஆதரவாளர்கள் கூட இது ‘தெய்வ நிந்தனை’ (Blasphemy) என்று கூறி ட்ரம்ப்பை விமர்சித்து வருகின்றனர்.
ட்ரம்ப்பின் தீவிர ஆதரவாளர்கள் மற்றும் செல்வாக்கு செலுத்துபவர்கள் கூட இந்தப் பதிவை ஆதரிக்கத் தயங்குகின்றனர். “கடவுளை யாரும் கேலி செய்யக்கூடாது” என்று அவர்கள் எச்சரிக்கை விடுத்துள்ளனர். கிறிஸ்தவ ஒளிபரப்பு நெட்வொர்க்கைச் சேர்ந்த டேவிட் ப்ரோடி, “இது எல்லையை மீறிய செயல்” என்று கூறியுள்ளார். ட்ரம்ப் எதற்காக இதுபோன்ற உணர்ச்சிகரமான மற்றும் மத ரீதியான சர்ச்சைகளைத் தொடர்ந்து கிளப்புகிறார் என்று பலரும் கேள்வி எழுப்பி வரும் நிலையில், இந்தப் புகைப்படம் அமெரிக்க அரசியல் மற்றும் மத வட்டாரங்களில் பெரும் விவாதப் பொருளாக மாறியுள்ளது.
