மத்திய கிழக்கில் அமெரிக்கப் படைகள் மீது ஈரான் நடத்தி வரும் தொடர் தாக்குதல்களில் அமெரிக்க வீரர்கள் உயிரிழந்து வரும் நிலையில், “கொல்லப்படும் ஒவ்வொரு அமெரிக்க வீரரின் உயிருக்கும் ஈரானிடம் இருந்து பல மடங்கு கொடூரமான முறையில் பழிக்குப் பழி வாங்கப்படும்” என்று அமெரிக்கக் குடியரசுத் தலைவர் டொனால்ட் டிரம்ப் மிகக் கடுமையான தொனியில் எச்சரித்துள்ளார். தனது ‘ட்ரூத் சோஷியல்’ (Truth Social) சமூக வலைதளப் பக்கத்தில் பதிவிட்டுள்ள அவர், ஈரான் மீது இனி இரக்கமற்ற முறையில் எதிர்த்தாக்குதல்கள் நடத்தப்படும் என்பதைத் திட்டவட்டமாகத் தெரிவித்துள்ளார்.
மத்திய கிழக்கில் அமைந்த ஜோர்டான் மற்றும் வடக்கு ஈராக் பகுதியில் உள்ள அமெரிக்க ராணுவ முகாம்களைக் குறிவைத்து ஈரான் சமீபத்தில் ஏவுகணை மற்றும் ட்ரோன் தாக்குதல்களை நடத்தியது. இதில் முதலாம் லெப்டினன்ட் டைலர் ஜேம்ஸ் ஃபீஹான் மற்றும் பிரைவேட் இசபெல்லா கோன்சலஸ் உள்ளிட்ட 3 அமெரிக்க வீரர்கள் பரிதாபமாகப் பலியாகினர். இந்த உயிரிழப்புகள் அமெரிக்கப் பாதுகாப்புத் துறையினரிடையேயும் வெள்ளை மாளிகையிலும் பெரும் கொந்தளிப்பை ஏற்படுத்தியதைத் தொடர்ந்தே டிரம்ப் இந்த ஆக்ரோஷமான எச்சரிக்கையை விடுத்துள்ளார்.
தனது அதிகாரப்பூர்வப் பதிவில் டிரம்ப், “ஈரான் ஒரு அமெரிக்க வீரரைக் கொல்லும் ஒவ்வொரு முறைக்கும், அவர்கள் அதற்கான விலையைப் பல மடங்கு அதிகமாகச் செலுத்துவார்கள்!” என்று குறிப்பிட்டுள்ளார். மேலும், இந்தத் தாக்குதல் உத்தரவை அமெரிக்கப் பாதுகாப்புச் செயலாளர் பீட் ஹெக்செத், ராணுவத் தளபதி டானியல் கெய்ன் மற்றும் அனைத்துப் படைத் தளபதிகளுக்கும் நேரடியாகப் பிறப்பித்துள்ளதாகவும் அவர் சுட்டிக்காட்டியுள்ளார்.
டிரம்பின் இந்த எச்சரிக்கையைத் தொடர்ந்து, ஈரானில் உள்ள ரகசிய ஏவுகணைத் தளங்கள், ட்ரோன் கட்டுப்பாட்டு மையங்கள் மற்றும் வான் பாதுகாப்பு அமைப்புகளைக் குறிவைத்து அமெரிக்கச் மத்தியக் கட்டளைப் பிரிவு (CENTCOM) தொடர்ச்சியாக 9-வது இரவாகப் பிரம்மாண்ட வான்வழித் தாக்குதல்களை நடத்தியுள்ளது. அதேவேளையில், ஈரானும் பஹ்ரைன் மற்றும் குவைத்தில் உள்ள அமெரிக்க ராணுவ இலக்குகள் மீது ஏவுகணைகளை வீசிப் பதிலடி கொடுத்து வருவதால், மத்திய கிழக்கு பிராந்தியத்தில் ஒட்டுமொத்தப் போரின் தீவிரமும் கட்டுக்கடங்காமல் அதிகரித்து வருகிறது
