செந்தில் பாலாஜி வெற்றி! கோவை தெற்கில் திக் திக் நிமிடங்கள்; தவெக வேட்பாளரை வீழ்த்தி திமுக சாதனை – கொங்கு மண்டலத்தில் தப்பித்த உதயசூரியன்!

தமிழகத்தின் மிகவும் எதிர்பார்க்கப்பட்ட நட்சத்திர தொகுதிகளில் ஒன்றான கோவை தெற்கில், திமுக வேட்பாளர் வி. செந்தில் பாலாஜி தனது வெற்றியை உறுதி செய்துள்ளார். இன்று காலை வாக்கு எண்ணிக்கை தொடங்கியது முதலே, இத்தொகுதியில் திமுக, அதிமுக மற்றும் தமிழக வெற்றிக் கழகம் இடையே மும்முனைப் போட்டி நிலவியது. குறிப்பாக, 15-வது சுற்று வரை தமிழக வெற்றிக் கழகத்தின் வேட்பாளர் வி. செந்தில் குமாருக்கும், செந்தில் பாலாஜிக்கும் இடையே வாக்கு வித்தியாசம் மிகவும் குறைவாகவே இருந்தது. இறுதியில், தபால் வாக்குகள் மற்றும் கடைசி மூன்று சுற்று இயந்திர வாக்குகளில் முன்னிலை பெற்ற செந்தில் பாலாஜி, சுமார் 4,000-க்கும் மேற்பட்ட வாக்குகள் வித்தியாசத்தில் வெற்றி வாகை சூடினார்.

கடந்த 2021 தேர்தலில் பாஜக-வின் வானதி சீனிவாசன் வெற்றி பெற்ற இந்தத் தொகுதியை, 5 ஆண்டுகளுக்குப் பிறகு மீண்டும் திமுக தனது வசப்படுத்தியுள்ளது. சிறைவாசம் மற்றும் பல்வேறு அரசியல் சர்ச்சைகளுக்குப் பிறகு கரூர் மாவட்டத்திலிருந்து கோவைக்குத் தனது தேர்தல் களத்தை மாற்றிய செந்தில் பாலாஜிக்கு, இந்த வெற்றி ஒரு மிகப்பெரிய அரசியல் மறுவாழ்வாகக் கருதப்படுகிறது. கொங்கு மண்டலத்தில் பெரும்பாலான தொகுதிகளில் விஜய்யின் தமிழக வெற்றிக் கழகம் மற்றும் அதிமுக ஆதிக்கம் செலுத்தி வரும் நிலையில், கோவை தெற்கில் திமுக பெற்ற இந்த வெற்றி அக்கட்சித் தொண்டர்களிடையே உற்சாகத்தை ஏற்படுத்தியுள்ளது.

கோவை தெற்கு தொகுதியில் பதிவான வாக்குகளில் சிறுபான்மையினர் மற்றும் நகர்ப்புற இளைஞர்களின் வாக்குகள் செந்தில் பாலாஜியின் வெற்றிக்கு முக்கியக் காரணமாக அமைந்ததாக அரசியல் நோக்கர்கள் கருதுகின்றனர். அதிமுக-வின் முன்னாள் எம்.எல்.ஏ அம்மன் அர்ஜுனன் மூன்றாம் இடத்திற்குத் தள்ளப்பட்டுள்ளார். செந்தில் பாலாஜியின் வெற்றியைத் தொடர்ந்து கோவை மாநகர் முழுவதும் திமுகவினர் பட்டாசு வெடித்து, இனிப்புகள் வழங்கி கொண்டாடி வருகின்றனர். இந்த வெற்றிக் கடிதத்தை செந்தில் பாலாஜி இன்று மாலை முதலமைச்சர் மு.க.ஸ்டாலினிடம் நேரில் வழங்க உள்ளதாகத் தகவல்கள் தெரிவிக்கின்றன.

தமிழகம் முழுவதும் விஜய்யின் ‘விசில்’ சத்தம் ஓங்கி ஒலித்து வரும் வேளையில், கோவை தெற்கில் ‘உதயசூரியன்’ தனது ஒளியைத் தக்கவைத்துள்ளது குறிப்பிடத்தக்கது. தவெக வேட்பாளர் வி. செந்தில் குமார் கடும் சவாலை அளித்து இரண்டாவது இடத்தைப் பிடித்தது, அத்தொகுதியில் புதிய அரசியல் மாற்றத்திற்கான விதையாகப் பார்க்கப்படுகிறது. பாஜக-வின் கோட்டையாகக் கருதப்பட்ட கோவை தெற்கில் இம்முறை தாமரை மலரத் தவறியதுடன், அக்கட்சியின் வாக்கு சதவீதம் பெருமளவு சரிந்துள்ளது. இந்தத் தேர்தல் முடிவுகள் கோவை மாவட்டத்தின் எதிர்கால அரசியலில் செந்தில் பாலாஜியின் செல்வாக்கை மேலும் வலுப்படுத்தும் என்று எதிர்பார்க்கப்படுகிறது.