ரஷ்ய அதிபர் விளாடிமிர் புதினின் நீண்டகால நண்பரும், முன்னாள் பாதுகாப்புத் துறை அமைச்சருமான செர்ஜி ஷோய்கு, தற்போது புதினை வீழ்த்தும் அளவுக்கு மிகப்பெரிய அச்சுறுத்தலாக மாறியுள்ளதாக ஐரோப்பிய உளவுத்துறை அறிக்கைகள் எச்சரிக்கின்றன. 2017-ல் புதினும் ஷோய்குவும் இணைந்து மேலாடையின்றி மீன்பிடிக்கச் சென்ற (Fishing Pals) புகைப்படங்கள் அப்போது வைரலாகின. ஆனால், உக்ரைன் போரில் ஏற்பட்ட பின்னடைவுகள் மற்றும் ராணுவ ரீதியான தோல்விகளுக்குப் பிறகு, இவர்களுக்கிடையிலான நட்பு விரிசலடைந்து தற்போது ஜென்மப் பகையாக மாறியுள்ளது.
கடந்த 2024-ம் ஆண்டு பாதுகாப்பு அமைச்சர் பதவியிலிருந்து ஷோய்கு நீக்கப்பட்டது அவருக்கு இழைக்கப்பட்ட அவமானமாகக் கருதப்படுகிறது. தற்போது தேசிய பாதுகாப்பு கவுன்சில் செயலாளராக இருந்தபோதிலும், ராணுவத்தின் உயர் அதிகாரிகளுடன் அவர் கொண்டுள்ள ரகசியத் தொடர்புகள் புதினுக்குப் பெரும் கவலையை ஏற்படுத்தியுள்ளன. புதினின் ‘நிழல்’ போல இருந்த ஷோய்கு, தற்போது அதிபர் மாளிகையான கிரெம்ளினுக்குள்ளேயே (Kremlin) ஒரு ரகசியக் குழுவை உருவாக்கி, புதினுக்கு எதிராக ராணுவப் புரட்சியை (Coup) நடத்தத் திட்டமிடுவதாகக் கூறப்படுகிறது.
புதின் தற்போது கடும் மன உளைச்சலுக்கும் சந்தேகத்திற்கும் (Paranoia) ஆளாகியுள்ளதாகக் கூறப்படுகிறது. தனது நெருங்கிய வட்டாரத்திலிருந்தே யாராவது தன்னைத் துரோகம் செய்யக்கூடும் அல்லது படுகொலை செய்ய முயற்சிப்பார்கள் என அவர் அஞ்சுவதால், கிரெம்ளினில் உள்ள முக்கிய அதிகாரிகளை ரகசியமாகக் கண்காணித்து வருகிறார். “ஷோய்குவின் குலம்” (Shoigu’s Clan) என்று அழைக்கப்படும் ஒரு குழு, ரஷ்யாவின் உளவு அமைப்பான எஃப்.எஸ்.பி (FSB) மீது செல்வாக்கு செலுத்த முயற்சிப்பது புதினின் அதிகாரத்தைப் பலவீனப்படுத்தியுள்ளது.
ரஷ்யாவின் பொருளாதாரம் சரிந்து வரும் வேளையிலும், உக்ரைன் போர் முடிவில்லாமல் நீண்டு வருவதாலும் மக்கள் மற்றும் ராணுவத்தினரிடையே அதிருப்தி நிலவுகிறது. இந்தச் சூழலைப் பயன்படுத்தி, ஷோய்கு ஒரு ‘மீட்பராக’ உருவெடுக்க முயற்சிப்பதாக அரசியல் விமர்சகர்கள் கருதுகின்றனர். புதினை வீழ்த்திவிட்டு ஒரு புதிய அரசாங்கத்தை அமைப்பதற்கான திரைமறைவு வேலைகள் மாஸ்கோவில் மிக வேகமாக நடந்து வருகின்றன. ஒருகாலத்தில் மீன்பிடிக்கச் சென்ற நண்பர்கள், இன்று ரஷ்யாவின் அதிகாரத்தைக் கைப்பற்ற ஒருவரையொருவர் வீழ்த்தத் துடிப்பது சர்வதேச அரசியலில் ஒரு பரபரப்பான திருப்பமாக மாறியுள்ளது.
