டிரம்ப் நிர்வாகம் அண்மையில் வெளியிட்ட ரகசிய UFO கோப்புகள் உலகெங்கும் பெரும் அதிர்வலைகளை ஏற்படுத்தியுள்ளன. குறிப்பாக, 2013-ஆம் ஆண்டு எடுக்கப்பட்ட இரண்டு நிமிட வீடியோவில், இருண்ட வானில் ‘எட்டு முனை நட்சத்திரம்’ போன்ற ஒரு மர்மப் பொருள் மிக வேகமாகப் பாய்ந்து செல்வது பதிவாகியுள்ளது. இந்த விண்கலம் தனது வடிவத்தை அவ்வப்போது மாற்றிக்கொள்வது பார்ப்பவர்களை உறைய வைக்கிறது. இது வெறும் வேற்றுக்கிரக விண்கலம் மட்டுமல்ல, பைபிளில் விவரிக்கப்பட்டுள்ள தெய்வீக ஆற்றல் கொண்ட ஒரு சக்தி என்று மதத் தலைவர்கள் கிளப்பியுள்ள வாதம் இப்போது காட்டுத்தீயாகப் பரவி வருகிறது.
பைபிளின் எசேக்கியேல் (Ezekiel) புத்தகத்தில் விவரிக்கப்பட்டுள்ள ‘செருபிம்’ (Cherubim) எனப்படும் பல இறக்கைகள் மற்றும் கண்கள் கொண்ட தேவதூதர்களின் உருவத்தோடு, இந்த எட்டு முனை விண்கலம் ஒத்துப்போவதாகப் பாஸ்டர் ஜோஷ் ஹோவெர்டன் போன்ற ஆன்மீகப் பெரியவர்கள் சுட்டிக்காட்டுகின்றனர். “சக்கரங்களுக்குள் சக்கரங்கள்” சுழல்வது போன்றும், மின்னும் ஒளியுடனும் கடவுளின் சிம்மாசனத்திற்கு அருகில் நகரும் அந்த விசித்திரமான விண்வெளி அமைப்புகளே இப்போது கேமராவில் சிக்கியுள்ளனவா? என்ற கேள்வி விடைதெரியாத மர்மமாக உருவெடுத்துள்ளது.
அமெரிக்க நாடாளுமன்ற உறுப்பினர் அன்னா பவுலினா லூனா, இந்த மர்மப் பொருளையும் தேவதூதர்களின் ஓவியத்தையும் ஒப்பிட்டுப் பகிர்ந்துள்ள நிலையில், துணை ஜனாதிபதி ஜே.டி. வான்ஸ் ஒரு படி மேலே சென்று அதிர வைத்துள்ளார். பல UFO நிகழ்வுகள் வேற்றுக்கிரகவாசிகள் சம்பந்தப்பட்டவை அல்ல, அவை ஆன்மீக அல்லது அமானுஷ்ய சக்திகளுடன் தொடர்புடையவை என்று அவர் கூறியுள்ளார். கிறிஸ்தவ உலகப்பார்வையின் படி, இவை சில நேரங்களில் தீய சக்திகளின் (Demonic entities) ஊடுருவலாகக் கூட இருக்கலாம் என்று அவர் முன்வைத்துள்ள கருத்து சர்வதேச அளவில் விவாதத்தை சூடாக்கியுள்ளது.
வெள்ளிக்கிழமை வெளியான நூற்றுக்கணக்கான ரகசிய வீடியோக்கள் மற்றும் புகைப்படங்களில், இந்த ‘எட்டு முனை’ விண்கலம் தான் ஒட்டுமொத்த உலகின் கவனத்தையும் ஈர்த்துள்ளது. இது அறிவியலுக்கு அப்பாற்பட்ட ஒரு தெய்வீக எச்சரிக்கையா அல்லது மனித இனம் இதுவரை அறிந்திராத ஒரு தொழில்நுட்பமா? என்ற குழப்பம் நீடிக்கிறது. எது எப்படியோ, ஏலியன் தேடல் என்பது இப்போது மதக் கோட்பாடுகளுடனும், பைபிள் ரகசியங்களுடனும் இணைந்து ஒரு புதிய பரிமாணத்தை எட்டியுள்ளது என்பது மட்டும் நிதர்சனம்.
