ஈரானின் அதிகாரப்பூர்வ செய்தி நிறுவனமான ‘தஸ்னிம்’ (Tasnim) வெளியிட்டுள்ள தகவலின்படி, ஞாயிற்றுக்கிழமை காலை ஓமன் வளைகுடா பகுதியில் பறந்து கொண்டிருந்த அமெரிக்க விமானப்படையின் எஃப்-35 மின்னல் II (F-35 Lightning II) போர் விமானம், சர்வதேச விமானப் போக்குவரத்து விதிகளின்படி ‘7700’ என்ற அவசரக் குறியீட்டை (Squawk Code) அனுப்பியுள்ளது. இந்தச் சிக்னல் என்பது விமானத்தில் ஏதோ ஒரு தீவிரமான இயந்திரக் கோளாறு அல்லது தொழில்நுட்பப் பிரச்சனை ஏற்பட்டுள்ளதைக் குறிப்பதாகும். இந்தச் சிக்னலை அனுப்பிய சில நிமிடங்களிலேயே அந்த விமானம் தனது திசையை மாற்றி, ஐக்கிய அரபு அமீரகம் (UAE) நோக்கிச் செல்லத் தொடங்கியதாகத் தெரியவந்துள்ளது.
விமானப் போக்குவரத்துத் தரவுகளின்படி (FlightRadar24), அந்த எஃப்-35 விமானம் ஓமன் வளைகுடாவிலிருந்து மெதுவாகத் தனது உயரத்தைக் குறைத்துக் கொண்டே அமீரக வான்பரப்பிற்குள் நுழைந்துள்ளது. ஈரான் மற்றும் அமெரிக்கா இடையே கடந்த சில நாட்களாகக் கடற்படை மோதல்கள் தீவிரமடைந்துள்ள சூழலில் இந்தச் சம்பவம் நிகழ்ந்துள்ளது. கடந்த வெள்ளிக்கிழமை, ஈரானின் இரண்டு எண்ணெய் டாங்கர்களை அமெரிக்கப் படைகள் தாக்கியதைத் தொடர்ந்து, ஈரான் அதற்குப் பதிலடி கொடுத்து வருவதாக அறிவித்திருந்தது. இத்தகைய போர்ச் சூழலில், அமெரிக்காவின் அதிநவீன மறைந்து தாக்கும் (Stealth) போர் விமானம் அவசர நிலையை அறிவித்தது சர்வதேச அளவில் உன்னிப்பாகக் கவனிக்கப்படுகிறது.
ஈரான் தரப்பில் இது குறித்துக் கூறுகையில், தங்களது வான்பாதுகாப்பு அமைப்புகளின் எச்சரிக்கையாலோ அல்லது தொழில்நுட்பத் தலையீட்டாலோ இந்த விமானத்தில் கோளாறு ஏற்பட்டிருக்கலாம் என மறைமுகமாகக் குறிப்பிடுகின்றன. ஆனால், அமெரிக்க மத்திய ராணுவத் தலைமையகம் (CENTCOM) இதுவரை இந்தச் சம்பவம் குறித்து அதிகாரப்பூர்வமான எந்த விளக்கத்தையும் அளிக்கவில்லை. பொதுவாக, இது போன்ற 7700 சிக்னல்கள் எஞ்சின் கோளாறு, மின்சாரத் தடை அல்லது விமானிக்கு ஏற்படும் உடல்நலக் குறைவு காரணமாகவும் விடுக்கப்படலாம். ஆனால், போர்க்களத்திற்கு மிக அருகில் இந்தச் சம்பவம் நடந்திருப்பது பல்வேறு யூகங்களை எழுப்பியுள்ளது.
சமீபத்தில் ஈரான் தனது ஹார்முஸ் ஜலசந்தியை அமெரிக்க ஆதரவு நாடுகளுக்கு மூடிவிடப் போவதாக எச்சரித்திருந்தது. இதற்கிடையில், அமெரிக்காவின் மேலும் இரண்டு எரிபொருள் நிரப்பும் விமானங்கள் (KC-135 மற்றும் KC-46) இதே போன்று அவசர சிக்னல்களை அனுப்பியதாகத் தகவல்கள் கூறுகின்றன. இது அமெரிக்க விமானங்களின் பராமரிப்பில் உள்ள குறைபாடா அல்லது ஈரானின் மின்னணுப் போர்முறைத் (Electronic Warfare) தாக்குதலா என்பது இன்னும் மர்மமாகவே உள்ளது. தற்போதைய நிலையில், அந்த எஃப்-35 விமானம் பாதுகாப்பாக அமீரகத்தில் உள்ள ஒரு தளத்தில் தரையிறங்கியதாகக் கருதப்படுகிறது.
