ருமேனியப் பகுதியில் ரஷ்ய ட்ரோன் விழுந்து பொதுமக்கள் காயமடைந்தது இதுவே முதல்முறை என்பதால், இது சர்வதேச அளவில் பெரும் பதற்றத்தை ஏற்படுத்தியுள்ளது. இந்தச் சம்பவத்தைத் தொடர்ந்து, நேட்டோ அமைப்பின் பொதுச் செயலாளர் மார்க் ரூட்டே, ருமேனிய அதிபர் நிகுஷோர் டானுடன் அவசரத் தொலைபேசி ஆலோசனை நடத்தினார். பின்னர் எக்ஸ் (X) தளத்தில் பதிவிட்ட மார்க் ரூட்டே, “ரஷ்யாவின் இந்த பொறுப்பற்ற நடவடிக்கை நம் அனைவருக்கும் ஆபத்தானது. நேட்டோ படைகள் தங்களின் நட்பு நாடுகளின் எல்லைகளின் ஒவ்வொரு அங்குலத்தையும் (defend every inch) பாதுகாக்க முழுத் தயார் நிலையில் உள்ளன” என்று ரஷ்யாவிற்கு பலத்த எச்சரிக்கை விடுத்துள்ளார்.
இந்தத் தாக்குதல் ருமேனியாவின் இறையாண்மையைக் கடுமையாக மீறும் செயல் என்று ருமேனிய அதிபர் நிகுஷோர் டான் கண்டனம் தெரிவித்துள்ளார். மேலும், இந்த விவகாரத்தில் ரஷ்யாவிற்கு தகுந்த பதிலடி கொடுக்கும் வகையில், கருங்கடல் துறைமுக நகரான கான்ஸ்டான்டாவில் (Constanța) உள்ள ரஷ்ய தூதரகத்தை உடனடியாக மூடவும், ரஷ்ய தூதரை நாட்டை விட்டு வெளியேற்றவும் (expel) ருமேனியா உத்தரவிட்டுள்ளது. நாட்டின் வான்வெளியில் ரேடார் மூலம் இந்த ட்ரோன் கண்காணிக்கப்பட்ட போதிலும், குடியிருப்புப் பகுதிகள் அருகே இருந்ததாலும், வெறும் 4 நிமிடங்களே அது வான்வெளியில் இருந்ததாலும், பொதுமக்களின் பாதுகாப்பைக் கருதி அதை சுட்டு வீழ்த்த முடியவில்லை என்று ருமேனிய ராணுவம் விளக்கமளித்துள்ளது.
ஐரோப்பிய ஒன்றியத்தின் தலைவர் உர்சுலா வான் டெர் லேயன், ரஷ்யா மீண்டும் ஒரு சிவப்புக் கோட்டைத் தாண்டியுள்ளது என்று சாடியுள்ளார். அத்துடன் ரஷ்யா மீது 21-வது கட்ட பொருளாதாரத் தடைகளை விதிக்க ஐரோப்பிய ஒன்றியம் தயாராகி வருவதாகவும் அறிவித்துள்ளார். உக்ரைன் போரின் உக்கிரம் நேட்டோ நாடுகளின் எல்லைகளுக்குள் ஊடுருவியுள்ள இந்தச் சம்பவம், கிழக்கு ஐரோப்பிய பிராந்தியத்தில் எப்போது வேண்டுமானாலும் ஒரு பெரிய அளவிலான உலகப்போர் வெடிக்கலாம் என்ற அச்சத்தை உலக நாடுகளிடையே தீவிரப்படுத்தியுள்ளது.
