தமிழகத்தில் பெண்கள் மற்றும் குழந்தைகளின் பாதுகாப்பை 100 சதவீதம் உறுதி செய்யும் நோக்கில் முதலமைச்சர் சி. ஜோசப் விஜய் அவர்களால் இன்று (ஜூன் 9, 2026) ‘சிங்கப்பெண் சிறப்பு அதிரடிப்படை’ (Singappen Special Task Force) முறைப்படி தொடங்கி வைக்கப்பட்டது. சென்னை ராஜரத்தினம் மைதானத்தில் நடைபெற்ற இந்த பிரம்மாண்ட தொடக்க விழாவில், படையின் லோகோ மற்றும் பிரத்யேக ரோந்து வாகனங்களை முதல்வர் விஜய் கொடியசைத்துத் தொடங்கி வைத்தார். இத்திட்டத்தின் செயல்பாடுகள் மற்றும் அதன் முக்கிய அம்சங்கள் குறித்துத் தமிழகத்தின் புதிய சட்டம் ஒழுங்கு டிஜிபி (DGP) மகேஷ்குமார் அகர்வால் செய்தியாளர்களிடம் விரிவாக விளக்கியுள்ளார்.
செய்தியாளர்கள் சந்திப்பில் பேசிய டிஜிபி மகேஷ்குமார் அகர்வால், “தமிழக முதலமைச்சரின் கனவுத் திட்டமான இந்த சிங்கப்பெண் அதிரடிப்படை இன்று முதல் மாநிலம் முழுவதும் முழு வீச்சில் செயல்பாட்டுக்கு வருகிறது. இந்தியாவில் முதன்முறையாகப் பெண்கள் பாதுகாப்பிற்காக ட்ரோன் தொழில்நுட்பத்தைப் (Drone-based Patrol) பயன்படுத்தி ரோந்துப் பணிகளை மேற்கொள்ளும் அதிநவீன உத்தி இப்படையில் புகுத்தப்பட்டுள்ளது. முதற்கட்டமாக, பெண்கள் மற்றும் மாணவிகள் அதிகம் கூடும் இடங்களான பள்ளி, கல்லூரி வளாகங்கள், பேருந்து நிலையங்கள், ரயில் நிலையங்கள், மற்றும் தகவல் தொழில்நுட்பப் பூங்காக்கள் (IT Parks) இருக்கும் பகுதிகள் கண்டறியப்பட்டு, அங்கு இந்தச் சிறப்புப் படையினர் 24 மணி நேரமும் தீவிரக் கண்காணிப்பில் ஈடுபடுவார்கள்” என்று கூறினார்.
மேலும் இந்த சிறப்புப் படையின் கட்டமைப்பு குறித்துப் பேசிய அவர், முதற்கட்டமாக ஐஜி (IG) பவானீஸ்வரி அவர்களின் தலைமையில் ஒரு எஸ்பி, 2 டிஎஸ்பிக்கள், 4 இன்ஸ்பெக்டர்கள் உள்ளடக்கிய பிரத்யேகப் பிரிவு உருவாக்கப்பட்டுள்ளது. முதற்கட்டப் பணிகளுக்காகத் தமிழக அரசு 354 கோடி ரூபாய் நிதியை ஒதிக்கீடு செய்துள்ளது. இதனைத் தொடர்ந்து, இரண்டாம் கட்டமாக இந்தப் படைக்காக மட்டுமே பிரத்யேகமாக 2,500 புதிய பெண் காவலர் பணியிடங்கள் உருவாக்கப்பட்டு மிக விரைவில் நேரடிப் பணி நியமனம் செய்யப்பட உள்ளனர். இதன் மூலம் ஒவ்வொரு மாவட்டத்திலும் தன்னாட்சி அதிகாரம் கொண்ட தனிப் பிரிவாகச் சிங்கப்பெண் அதிரடிப்படை செயல்படும் எனத் தெரிவித்தார்.
பெண்களுக்கு எதிரான குற்றங்களுக்கும் போதைப்பொருள் புழக்கத்திற்கும் நெருங்கிய தொடர்பு இருப்பதைச் சுட்டிக்காட்டிய டிஜிபி, போதைப்பொருள் நடமாட்டத்தை முற்றிலுமாக ஒடுக்குவதும், பெண்களுக்குத் தொல்லை தரும் சமூக விரோதிகள் மீது எவ்வித சமரசமுமின்றி உடனடி போக்சோ (POCSO) மற்றும் குண்டாஸ் சட்டங்களின் கீழ் கடுமையான நடவடிக்கை எடுப்பதே இந்தச் சிங்கப்பெண் படையின் முதன்மை அட்வைஸ் மற்றும் கடமையாகும் என்று உறுதியளித்தார். ஆபத்து காலத்தில் பெண்கள் உடனே தொடர்பு கொள்ளும் வகையில் அவசர உதவி எண்களும் இந்த ரோந்து வாகனங்களுடன் இணைக்கப்பட்டு, அழைப்பு வந்த சில நிமிடங்களிலேயே சம்பவ இடத்திற்குச் சென்று உதவும் வகையில் இப்படை மிக விரைவாகச் செயல்படும் என்றும் மகேஷ்குமார் அகர்வால் கூறினார்.
