தமிழகத்தில் முதலமைச்சர் விஜய் தலைமையிலான தமிழக வெற்றிக் கழக (த.வெ.க) அரசு கடந்த மே மாதம் பொறுப்பேற்றதைத் தொடர்ந்து, அங்கு கூட்டாட்சி அரசியல் களம் சூடுபிடித்துள்ளது. தேர்தலில் எந்தக் கட்சிக்கும் தனிப்பெரும்பான்மை கிடைக்காத நிலையில், த.வெ.க-விற்கு விடுதலைச் சிறுத்தைகள் கட்சி (வி.சி.க) உள்ளிட்ட கூட்டணிக் கட்சிகள் ஆதரவு அளித்து அமைச்சரவையிலும் பங்கெடுத்தன. வி.சி.க-வின் வன்னியரசு தற்போது சமூக நீதி இலாகா அமைச்சராகப் பொறுப்பேற்றுள்ளார். இந்தச் சூழலில், தனியார் தொலைக்காட்சி ஒன்றுக்குப் பேட்டியளித்த வி.சி.க தலைவர் தொல். திருமாவளவன், தங்களது அரசியல் நிலைப்பாடு குறித்து அதிரடியான கருத்துக்களைப் பகிர்ந்துள்ளார்.
அப்பொழுது பேசிய திருமாவளவன், த.வெ.க அரசுக்கு ஏற்பட்ட அரசியல் சந்தேகங்களைப் போக்கவும், ஆளுநர் ஆட்சி அமல்படுத்தப்படுவதைத் தடுக்கவுமே தாங்கள் ஆரம்பத்தில் நிபந்தனையற்ற ஆதரவை வழங்கியதாகக் குறிப்பிட்டார். த.வெ.க அரசுக்கு ஆட்சி அமைக்கக் கொடுத்த ஆதரவிற்குப் பரிசாகவே அமைச்சரவையில் வி.சி.க-விற்கு இடம் வழங்கப்பட்டது என்றும், ஆனால் வெறும் அமைச்சரவை பங்கெடுப்பை மட்டும் வைத்துக் கொண்டு த.வெ.க-வுடன் அதிகாரப்பூர்வமாகத் தங்களை முழுமையாக இணைத்துக் கொள்ளவில்லை என்றும் அவர் தெளிவுபடுத்தினார்.
மேலும் அவர் பேசுகையில், “நாங்கள் எந்த நேரத்திலும் விஜய் அமைச்சரவையில் இருந்து வெளியே வரலாம். அமைச்சரவையில் இடம்பெற்றுவிட்டோம் என்ற ஒரே காரணத்திற்காக, த.வெ.க-வுடன் நிரந்தரக் கூட்டணியை உருவாக்கிவிட்டோம் என்று யாரும் பொருள் கொள்ளக் கூடாது. நாங்கள் இன்னும் தேர்தல் அல்லது அரசியல் ரீதியாக முறையான கூட்டணியை த.வெ.க-வுடன் அமைத்துக் கொள்ளவில்லை என்பதுதான் தற்போதைய உண்மை நிலை. தனியாகவே இருந்து ஆதரவு கொடுக்கும் சுயாதீனமான அரசியல் நிலைப்பாட்டை எங்களால் எடுக்க முடியும்” எனத் தெறிக்கவிட்டுள்ளார்.
தி.மு.க கூட்டணியில் இருந்து கொண்டு த.வெ.க அமைச்சரவையில் வி.சி.க இணைந்தது ஏற்கனவே அரசியல் வட்டாரங்களில் பெரும் சலசலப்பை ஏற்படுத்தியிருந்தது. குறிப்பாக தி.மு.க மூத்த தலைவர்களின் விமர்சனங்களுக்கு திருமாவளவன் பதில் அளித்து வந்த நிலையில், தற்போது ‘எந்த நேரத்திலும் அமைச்சரவையை விட்டு வெளியேறுவோம்’ என அவர் பேசியிருப்பது தமிழக அரசியலில் புதிய புயலைக் கிளப்பியுள்ளது. விஜய் அரசுக்கான வி.சி.க-வின் ஆதரவு தற்காலிகமானது தானா மற்றும் அடுத்தகட்ட அரசியல் நகர்வு என்னவாக இருக்கும் என்ற விவாதங்கள் தற்போது தீவிரமடைந்துள்ளன.
