பிரித்தானியாவின் மிடில்ஸ்புரோ (Middlesborough) அருகே A66 நெடுஞ்சாலையில், தவறான பாதையில் அதிவேகமாக கார் ஓட்டிச் சென்று இரண்டு காவல் துறை அதிகாரிகளின் மரணத்திற்குக் காரணமாக இருந்த ‘ஜாய்ரைடர்’ ஒருவருக்காக நடத்தப்பட்ட நினைவஞ்சலிக் கூட்டம் பெரும் சர்ச்சையை ஏற்படுத்தியுள்ளது. விபத்து நடந்த இடத்திற்கு அருகே நூற்றுக்கணக்கான இளைஞர்கள் ஒன்றுகூடி ஆரஞ்சு நிற பலூன்களைப் பறக்கவிட்டும், முகமூடி அணிந்து கொண்டு புகை வெடிகளை (Flares) வெடித்தும் அஞ்சலி செலுத்திய நிகழ்வு உள்ளூர் மக்களிடையே அதிர்ச்சியை உருவாக்கியுள்ளது.
சமீபத்தில் A66 சாலையில் போலி எண் பலகையுடன் அதிவேகமாக வந்த வோக்ஸ்வேகன் பாஸாட் (Volkswagen Passat) கார், எதிர் திசையில் வந்த காவல் துறை ரோந்து வாகனத்தின் மீது பயங்கரமாக மோதியது. இந்த கோர விபத்தில் மேத்யூ பிளேட்ஸ், டாம் க்ளாஃப் ஆகிய இரு நேர்மையான காவல் அதிகாரிகளுடன், காரில் பயணித்த ஜாக்கூப் மாதுசியாக் (23) உள்ளிட்ட 5 இளைஞர்களும் சம்பவ இடத்திலேயே பரிதாபமாக உயிரிழந்தனர்.
உயிரிழந்த ஜாக்கூப் மாதுசியாக்கின் நினைவாக அவரது நண்பர்கள் ஏற்பாடு செய்த இந்த பலூன் வெளியீட்டு நிகழ்வில், 200க்கும் மேற்பட்ட முகமூடி அணிந்த இளைஞர்கள் கலந்துகொண்டனர். அவர்கள் வானத்தை நோக்கி ஆரஞ்சு வண்ணப் புகையை உமிழும் வெடிகளை வெடித்து அஞ்சலி செலுத்திய காட்சிகள் சமூக வலைதளங்களில் வெளியாகிப் பெரும் கண்டன அலையை எழுப்பியுள்ளன. காவல் அதிகாரிகளின் உயிரைப் பறித்த ஒரு குற்றச் செயலில் ஈடுபட்டவருக்கு இதுபோன்ற பிரம்மாண்ட அஞ்சலி செலுத்துவது, உயிரிழந்த அதிகாரிகளின் குடும்பத்தினரை அவமதிக்கும் செயல் என அப்பகுதி மக்கள் குற்றம்சாட்டுகின்றனர்.
இந்த விபத்து தொடர்பாகக் கிளீவ்லேண்ட் காவல்துறையினர் தீவிர விசாரணை மேற்கொண்டு வருகின்றனர். சட்டவிரோதக் கும்பலின் செயல்பாடுகளில் ஈடுபட்டதாக சந்தேகத்தின் பேரில் இதுவரை 12 பேர் கைது செய்யப்பட்டுள்ளனர். இந்த நினைவஞ்சலி நிகழ்வில் சட்டம் ஒழுங்கை மீறியவர்கள் மீதும் நடவடிக்கைகள் எடுக்கப்படலாம் என எதிர்பார்க்கப்படுகிறது.
