திரையுலகில் 20 ஆண்டுகளைக் கடந்து முன்னணி நடிகையாகத் திகழும் தமன்னா பாட்டியா, தற்போது ஒரு வெற்றிகரமான தொழில்முனைவோராகப் புதிய அவதாரமெடுத்துள்ளார். தனது தந்தை சந்தோஷ் பாட்டியாவுடன் இணைந்து ‘தமன்னா ஃபைன் ஜூவல்லரி’ (Tamannaah Fine Jewellery) என்ற புதிய நகை பிராண்டை அவர் அதிகாரப்பூர்வமாகத் தொடங்கியுள்ளார். மும்பையின் ஜுஹு பகுதியில் இதற்கான பிரத்யேகமான ‘ஃபிளாக்ஷிப்’ (Flagship) ஷோரூம் திறக்கப்பட்டுள்ளது. 15 ஆண்டுகளுக்கும் மேலாக நகைத்துறையில் அனுபவம் கொண்ட தனது தந்தையின் வழிகாட்டுதலுடன், இந்தத் தொழிலைத் தமன்னா தொடங்கியிருப்பது குறிப்பிடத்தக்கது.
இந்த புதிய நகை சேகரிப்புகள் “ஒகேஷன் தாண்டி” (Beyond the Occasion) என்ற தத்துவத்தின் அடிப்படையில் உருவாக்கப்பட்டுள்ளன. அதாவது, திருமணங்கள் அல்லது விசேஷங்களுக்கு மட்டுமே நகைகளை அணியாமல், பெண்கள் தினசரி வாழ்க்கையிலும் எளிதாக அணியக்கூடிய வகையில் நவீன டிசைன்களில் இவை வடிவமைக்கப்பட்டுள்ளன. 14K மற்றும் 18K தங்கத்தில், இயற்கையான வைரங்கள் (Natural Diamonds) மற்றும் நவரத்தினங்கள் பதிக்கப்பட்ட ‘ஹாஃப் & ஹாஃப்’, ‘தி ஃபிளிக்’ மற்றும் ‘பிளம்ப்டியஸ்’ ஆகிய மூன்று முக்கிய பிரிவுகளில் நகைகள் அறிமுகம் செய்யப்பட்டுள்ளன.
விலையைப் பொறுத்தவரை, இந்த நகைகள் சாமானியர்கள் முதல் வசதி படைத்தவர்கள் வரை கவரும் வகையில் அமைக்கப்பட்டுள்ளன. இவற்றின் ஆரம்ப விலை ரூ. 90,000-லிருந்து தொடங்கி ரூ. 11 லட்சத்திற்கும் மேல் நிர்ணயிக்கப்பட்டுள்ளது. மும்பையைத் தொடர்ந்து சென்னை, ஹைதராபாத் மற்றும் டெல்லி ஆகிய நகரங்களிலும் தனது கிளைகளைத் திறக்கத் தமன்னா திட்டமிட்டுள்ளார். சினிமாவில் பிஸியாக இருந்தாலும், தனது நீண்ட காலக் கனவான இந்த நகைத்தொழிலில் தமன்னா முழு மூச்சாக இறங்கியிருப்பது அவரது ரசிகர்களிடையே பெரும் வரவேற்பைப் பெற்றுள்ளது.
