இயேசு கிறிஸ்து சிலுவையில் அறையப்பட்டு உயிரிழந்த பின்னர், அவரது திருவுடலை சுற்றி வைக்கப்பட்டதாகக் கருதப்படும் வரலாற்றுச் சிறப்புமிக்க ‘டூரின் துணி’ (Shroud of Turin) தொடர்பான ஆராய்ச்சியில் புதிய அறிவியல் திருப்பம் ஏற்பட்டுள்ளது. கடந்த 1978-ஆம் ஆண்டு (சுமார் 48 ஆண்டுகளுக்கு முன்பு) இந்த புனித ஆடையிலிருந்து சேகரிக்கப்பட்ட மாதிரிகளை அதிநவீன தடயவியல் மரபணு (DNA) தொழில்நுட்பத்தின் மூலம் ஆய்வு செய்த விஞ்ஞானிகள், அந்த ஆடை கடந்து வந்த பல நூற்றாண்டு கால நீண்ட மற்றும் சிக்கலான பயணத்தின் தடயங்களைக் கண்டறிந்துள்ளனர்.
பேராசிரியர் நோமி புரோகோபியோ மற்றும் ஜியானி பார்காச்சியா தலைமையிலான சர்வதேச ஆய்வுக் குழுவினர் மேற்கொள்ளப்பட்ட இந்த ஆய்வின் முடிவுகள் ‘சயின்டிஃபிக் ரிப்போர்ட்ஸ்’ இதழில் வெளியாகியுள்ளன. முந்தைய பழைய முறைகளைப் போலன்றி, மாதிரிப் பொருட்களில் இருக்கும் அனைத்து உயிரின மரபணுக்களையும் விரிவாகப் பகுப்பாய்வு செய்யும் புதிய வரிசை முறை பயன்படுத்தப்பட்டது. இதில், துணியில் பதிந்துள்ள முதன்மை மனித டிஎன்ஏ, 1978-இல் மாதிரிகளைச் சேகரித்த தடயவியல் மருத்துவ நிபுணர் பியர்லூய்கி பைமா பொல்லோனின் மரபணுவோடு ஒத்துப்போவது கண்டுபிடிக்கப்பட்டது.
மேலும், பல நூறாண்டுகளாக மனிதர்களின் கரங்கள் இந்த ஆடையைத் தொட்டு கையாண்டதால் உருவான தோலின் புரோட்டீன்கள், சருமத்தில் வாழும் பாக்டீரியாக்கள் மற்றும் பூஞ்சைகளின் பதிவுகளும் இதில் கண்டறியப்பட்டுள்ளன. மனித மரபணுக்களில் ஐரோப்பிய வழித்தோன்றல்கள் மட்டுமன்றி, மத்திய கிழக்கின் ‘ட்ரூஸ்’ (Druze) பழங்குடியினரின் அரிய மரபணு அடையாளங்களும், தாவர டிஎன்ஏ-க்களில் கேரட் மற்றும் ஐரோப்பிய பண்ணை தாவரங்களின் கூறுகளும் கலந்து இருப்பது ஆடை வெவ்வேறு காலகட்டங்களில் பல்வேறு பிராந்தியங்களைக் கடந்து வந்துள்ளதை உறுதிப்படுத்துகிறது.
ஆயினும், இந்த அதிநவீன மரபணு ஆய்வுகளாலும் கூட டூரின் துணி 2,000 ஆண்டுகள் பழமையானதா அல்லது இடைக்காலத்தைச் சேர்ந்ததா (Medieval origin) என்ற இறுதி முடிவை தெள்ளத்தெளிவாக நிர்ணயிக்க முடியவில்லை என ஆய்வாளர்கள் சுட்டிக்காட்டியுள்ளனர். மனிதர்களின் தொடர் தொடர்பு மற்றும் சுற்றுச்சூழல் வெளிப்பாடுகளால் பல தகவல்கள் சிக்கலாகியுள்ள போதிலும், வரலாற்றுச் சிறப்புமிக்க கலைப்பொருட்களின் பின்னணியைக் கண்டறிய நவீன தடயவியல் அறிவியல் எவ்வாறு உதவுகிறது என்பதற்கு இந்த ஆராய்ச்சி மிகச்சிறந்த சான்றாக அமைந்துள்ளது.
