“அதிமுக என்றால் அது எடப்பாடி பழனிசாமி தான்” என்பதை அண்மையில் நடைபெற்ற பயிர்க்கடன் தள்ளுபடி கோரிய மாநிலம் தழுவியப் போராட்டத்தின் வெற்றி மூலம் இபிஎஸ் மீண்டும் நிரூபித்துள்ளதாகக் கட்சித் தொண்டர்கள் இடையே நம்பிக்கை பிறந்துள்ளது. கட்சியின் மூத்த தலைவர்களான எஸ்பி வேலுமணி, நத்தம் விஸ்வநாதன் மற்றும் கேபி அன்பழகன் உள்ளிட்ட அதிருப்தியாளர்கள் இபிஎஸ் அளித்த புதிய கட்சிப் பதவிகளை ஏற்காமல் புறக்கணித்து வரும் நிலையிலும், அவர்களைப் பொருட்படுத்தாமல் இபிஎஸ் களமிறக்கியக் களப்பணிகள் மாபெரும் வெற்றியைப் பெற்றுள்ளன.
விவசாய கடன்களை முழுமையாகத் தள்ளுபடி செய்யக் கோரி அதிமுக நடத்திய இந்தப் போராட்டத்தின் போது, தேனி, ராணிப்பேட்டை, ராமநாதபுரம் உள்ளிட்ட முக்கிய மாவட்டங்களுக்குப் பொறுப்பாளர்களாக அறிவிக்கப்பட்ட வேலுமணி உள்ளிட்ட மூத்த தலைவர்கள் யாரும் போராட்டங்களில் பங்கேற்கவில்லை. இருப்பினும், தலைவர்கள் வராத போதிலும் அந்தந்த மாவட்டங்களில் அதிமுக தொண்டர்களும், புதிய மாவட்டச் செயலாளர்களும் திரண்டு போராட்டத்தை எதிர்பார்த்ததை விடப் பிரம்மாண்டமான முறையில் வெற்றிகரமாக நடத்தி முடித்தது இபிஎஸ் தரப்பை மிகுந்த பூரிப்பில் ஆழ்த்தியுள்ளது.
கட்சியிலிருந்து வெளியேறிய நிர்வாகிகள் மற்றும் அதிருப்தியாளர்களின் மாவட்டங்களுக்குப் பதிலாக எடப்பாடி பழனிசாமி நியமித்த புதிய பொறுப்பாளர்கள், களத்தில் இறங்கி அபாரமாக வேலை பார்த்து வருவதை இந்த ஆர்ப்பாட்டம் உறுதி செய்துள்ளது. மூத்த தலைவர்கள் முடங்கினாலும் கட்சிப் பணிகள் எள்ளளவும் பாதிக்கப்படவில்லை என்பதை உணர்த்திய இந்தச் சம்பவம், வேலுமணி மற்றும் அவரது ஆதரவாளர் தரப்பிற்குப் மிகப்பெரிய அரசியல் பின்னடைவாகப் பார்க்கப்படுகிறது.
இதன் காரணமாக, வேலுமணி உள்ளிட்ட அதிருப்தி தலைவர்கள் முன்வைக்கும் கோரிக்கைகளையோ அல்லது அவர்கள் இழந்துவிட்ட பழைய முதன்மையான கட்சிப் பொறுப்புகளையோ இனி எடப்பாடி பழனிசாமி தரப்பு விட்டுக் கொடுக்காது எனக் கட்சி வட்டாரங்களில் கூறப்படுகிறது. உள்கட்சி எதிர்ப்புகளைத் தனது அரசியல் வியூகங்கள் மற்றும் தொண்டர்களின் பலம் மூலம் தவிடுபொடியாக்கியுள்ள இபிஎஸ்-ன் இந்த அதிரடி நகர்வு, அதிமுக உள்கட்சி அரசியலில் புதிய திருப்பத்தை ஏற்படுத்தியுள்ளது.
