அமெரிக்காவைச் சேர்ந்த சர்ச்சைக்குரிய யூடியூபர் ஜானி சோமாலி (Johnny Somali), தென்கொரியாவின் சியோல் நகரில் உள்ள இரண்டாம் உலகப் போர் ‘பாலியல் அடிமைகள்’ (Comfort Women) நினைவிடத்தில் அநாகரீகமான முறையில் நடந்துகொண்டதற்காக அவருக்கு ஆறு மாதங்கள் சிறை தண்டனை விதிக்கப்பட்டுள்ளது. கடந்த அக்டோபர் 2024-ல், போரின் போது ஜப்பானிய ராணுவத்தால் பாலியல் வன்கொடுமைக்கு உள்ளாக்கப்பட்ட பெண்களின் நினைவாக வைக்கப்பட்ட சிலைக்கு அருகில் அமர்ந்து கொண்டு, அநாகரீகமான சைகைகளைச் செய்ததோடு அதனை நேரலையும் செய்துள்ளார். இந்த வீடியோ வைரலானதைத் தொடர்ந்து, தென்கொரிய மக்களிடையே கொந்தளிப்பு ஏற்பட்ட நிலையில் அவர் மீது சட்ட நடவடிக்கை எடுக்கப்பட்டது.
ஜானி சோமாலி மீது பொது அமைதிக்குக் குந்தகம் விளைவித்தல், வணிக நடவடிக்கைகளுக்குத் இடையூறு செய்தல் (Obstruction of Business) மற்றும் பாலியல் வன்கொடுமை தொடர்பான சட்டப்பிரிவுகளின் கீழ் மொத்தம் எட்டு வழக்குகள் பதிவு செய்யப்பட்டன. ஏப்ரல் 14, 2026 அன்று நடைபெற்ற இறுதி விசாரணையில், அவர் மீதான அனைத்துக் குற்றச்சாட்டுகளும் நிரூபிக்கப்பட்டதைத் தொடர்ந்து, அவருக்கு ஆறு மாதங்கள் ‘கடுங்காவல் சிறை’ (Prison Labor) தண்டனை மற்றும் 20 நாட்கள் காவலில் வைக்க நீதிமன்றம் உத்தரவிட்டது. மேலும், அவர் ஒரு பாலியல் குற்றவாளியாகப் பதிவு செய்யப்பட வேண்டும் என்றும், குழந்தைகள் தொடர்பான நிறுவனங்களில் பணிபுரிய ஐந்து ஆண்டுகள் தடையும் விதிக்கப்பட்டுள்ளது.
விசாரணையின் போது, தான் ஒரு யூடியூபர் என்பதால் கவனத்தை ஈர்க்கவே இவ்வாறு செய்ததாகவும், அதற்காக மன்னிப்பு கோருவதாகவும் அவர் தெரிவித்தார். இருப்பினும், ஒரு நாட்டின் வரலாற்றையும் உணர்வுகளையும் கொச்சைப்படுத்துவதை ஏற்க முடியாது என்று நீதிபதி தெரிவித்தார். முன்னதாக, இதேபோன்ற அநாகரீகச் செயல்களுக்காக ஜப்பான் மற்றும் இஸ்ரேல் ஆகிய நாடுகளிலும் இவர் கைது செய்யப்பட்டுத் தடை விதிக்கப்பட்டவர் என்பது குறிப்பிடத்தக்கது. தற்போது விதிக்கப்பட்டுள்ள சிறை தண்டனையை அனுபவித்த பிறகு, அவர் தென்கொரியாவிலிருந்து நாடு கடத்தப்படுவார் என்றும், மீண்டும் அந்நாட்டிற்குள் நுழைய நிரந்தரத் தடை விதிக்கப்படும் என்றும் அதிகாரிகள் தெரிவித்துள்ளனர்.
சர்வதேச அளவில் சுற்றுலா செல்லும் யூடியூபர்கள் மற்றும் இன்ஃப்ளூயன்சர்கள், உள்ளூர் கலாச்சாரம் மற்றும் வரலாற்று நினைவிடங்களின் புனிதத்தைப் பேண வேண்டியது அவசியம் என்பதற்கு இந்தத் தீர்ப்பு ஒரு எச்சரிக்கையாக அமைந்துள்ளது. வெறும் ‘லைக்’குகளுக்காகவும் வருமானத்திற்காகவும் சமூக மதிப்பீடுகளைச் சிதைப்பவர்களுக்கு இத்தகைய கடுமையான தண்டனைகள் அவசியம் எனச் சமூக ஆர்வலர்கள் கருத்து தெரிவித்துள்ளனர். இந்தச் சம்பவத்தைத் தொடர்ந்து ஜானி சோமாலியின் யூடியூப் சேனலும் அந்நிறுவனத்தால் நிரந்தரமாக நீக்கப்பட்டுள்ளது.
