பிரிட்டனின் பர்மிங்ஹாம் நகர மையப் பகுதியான ஸ்டீபன்சன் தெரு மற்றும் கார்ப்பரேஷன் தெரு பகுதிகளில் ஹாலோவீன் கொண்டாட்டத்தின் போது வன்முறைச் சம்பவங்கள் வெடித்தன. இளைஞர் கும்பல் ஒன்று மக்கள் நடமாட்டம் அதிகம் உள்ள வீதிகளிலும், வணிகக் கடைகள் மற்றும் காவல் வாகனங்களை நோக்கியும் ஆபத்தான முறையில் பட்டாசுகளையும் வெடிகளையும் கொளுத்தி வீசியது. இதனால் அச்சமடைந்த பொதுமக்கள் மற்றும் வழிப்போக்கர்கள் தங்களது உயிரைக் காப்பாற்றிக் கொள்ள அங்கும் இங்குமாக ஓட்டம் பிடித்ததால் பகுதியில் பெருமளவில் சலசலப்பு ஏற்பட்டது.
சம்பவ இடத்திற்கு உடனடியாக விரைந்த வெஸ்ட் மிட்லண்ட்ஸ் காவல்துறையினர் வன்முறையில் ஈடுபட்ட 15 வயது முதல் 26 வயது வரையிலான 7 இளைஞர்களைக் கைது செய்தனர். அவர்கள் மீது தாக்குதல் நடத்துதல், சட்டவிரோதமாகப் பட்டாசுகள் வைத்திருத்தல் மற்றும் ஆபத்தான ஆயுதங்களை வைத்திருத்தல் உள்ளிட்ட பிரிவுகளின் கீழ் வழக்குகள் பதிவு செய்யப்பட்டுள்ளன. மேலும், அப்பகுதியில் சந்தேகத்திற்குரிய நபர்களைச் சோதனையிட அதிகாரிகளுக்கு அனுமதி அளிக்கும் வகையில் ‘பிரிவு 60’ (Section 60) உத்தரவு உடனடியாக அமல்படுத்தப்பட்டது.
இந்த வன்முறை குறித்துப் பேசிய பர்மிங்ஹாம் காவல் கண்காணிப்பாளர் டாம் ஜாய்ஸ், பொதுமக்களின் பாதுகாப்பைப் பேணுவதே தங்களது முதன்மை நோக்கம் என்றும், பட்டாசுகளை தவறாகப் பயன்படுத்துவது சட்டவிரோதமானது என்றும் எச்சரித்துள்ளார். இத்தகைய சமூக விரோதச் செயல்களில் ஈடுபடுபவர்கள் மீது கடுமையான அபராதமும் குற்றவியல் நடவடிக்கைகளும் பாயும் எனக் காவல் துறை உறுதியளித்துள்ளது.
தற்போது கைது செய்யப்பட்ட 7 நபர்களிடமும் காவல் துறையினர் தீவிர விசாரணை நடத்தி வருகின்றனர்.
நகர மையப் பகுதியில் மேற்கொண்டு அசம்பாவிதங்கள் ஏதும் நடக்காமல் தடுக்கத் துரிதக் கட்டுப்பாட்டு நடவடிக்கைகள் மற்றும் கண்காணிப்புப் பணிகள் தீவிரப்படுத்தப்பட்டுள்ளன.
