ஐக்கிய ராஜ்யத்தின் தலைநகரான லண்டனில் ‘ஒன் லண்டன்’ (One London) என்ற பெயரில் 1 பில்லியன் பவுண்ட் மதிப்பீட்டில் 74 அடுக்குகள் கொண்ட பிரமாண்டமான வானளாவிய கட்டிடம் கட்டப்பட உள்ளது. 309.6 மீட்டர் உயரத்தில் அமைக்கப்படவுள்ள இந்த கட்டிடம், லண்டனின் மிக உயரமான கட்டிடமான ‘தி ஷார்ட்’ (The Shard) கட்டிடத்திற்கு இணையான உயரத்தைக் கொண்டிருக்கும் என அறிவிக்கப்பட்டுள்ளது. கட்டிடத்தின் 11-வது தளத்தில் பொதுமக்கள் இலவசமாக வந்து பார்வையிடும் வகையில் மரங்கள் அடங்கிய ‘ஆகாயப் பூங்கா’ (Park in the Sky) உருவாக்கப்படும் எனத் தெரிவிக்கப்பட்டுள்ளது.
எரிக் பாரி ஆர்க்கிடெக்ட்ஸ் (Eric Parry Architects) நிறுவனத்தால் வடிவமைக்கப்பட்டுள்ள இந்த கட்டிடத்தின் 11-வது தளத்தில் 51 மரங்களுடன் கூடிய திறந்தவெளிப் பூங்கா அமைய உள்ளது. மேலும் இதன் 71-வது தளத்தில் லண்டனின் மிக உயரமான மதுபானக்கூடமும், 72-வது தளத்தில் லண்டன் அருங்காட்சியகம் ஒருங்கிணைக்கும் கல்வி சார்ந்த இடங்களும், 73-வது தளத்தில் ஐரோப்பாவின் மிக உயரமான பொதுமக்கள் பார்வையிடும் தளமும் உருவாக்கப்பட உள்ளன. லண்டனின் புனித ஹெலன் கோபுரம் இடிக்கப்பட்ட இடத்தில் 54,000 சதுர மீட்டருக்கும் அதிகமான பரப்பளவில் அலுவலக இடங்களுடன் இக்கட்டிடம் அமையவுள்ளது.
நகரத்தின் மையப் பகுதியில் தாவரங்கள் மற்றும் பசுமையை அதிகரிக்கும் நோக்கத்துடன் இந்தத் தனித்துவமான வானளாவிய கட்டிடம் வடிவமைக்கப்பட்டுள்ளது. சூழலியல் மற்றும் வணிகத் தேவைகளை ஒருங்கிணைத்து உருவாக்கப்படும் இந்த திட்டம் நகர்ப்புறக் கட்டிடக்கலையில் புதிய மைல்கல்லாக அமையும் என எதிர்பார்ப்புகள் எழுந்துள்ளன.
தற்போது இதற்கான திட்டமிடல் அனுமதி பெறப்பட்டுப் முதற்கட்டப் பணிகள் நிறைவடைந்துள்ளன.
திட்டத்தின்படி 2028-ஆம் ஆண்டில் கட்டுமானப் பணிகள் முறைப்படி தொடங்கப்பட்டு, 2033-ஆம் ஆண்டிற்குள் முழுமையாக முடிவடையும் என எதிர்பார்க்கப்படுகிறது.
