சென்னை ரிப்பன் மாளிகையில் நடைபெற்ற மாநகராட்சியின் மாதாந்திர மாமன்றக் கூட்டத்தில், அரசு நிகழ்ச்சிகள் மற்றும் திட்டத் திறப்பு விழாக்களில் கவுன்சிலர்கள் மற்றும் மேயர் புறக்கணிக்கப்படுவதாகப் புகார்கள் எழுந்தன. துணை மேயர் மகேஸ் குமார் மற்றும் பல்வேறு வார்டு கவுன்சிலர்கள் அதிகாரிகளின் ஒருதலைப்பட்சமான நடவடிக்கைகளுக்கு எதிராகக் குரல் எழுப்பினர்.
இதையடுத்த பேசிய மேயர் பிரியா, மக்கள் பிரதிநிதிகளுக்கு அதிகாரிகள் உரிய ஒத்துழைப்பு வழங்காவிட்டால் மாமன்றத்தைக் கலைத்துவிட்டு அதிகாரிகளே கூட்டத்தை நடத்திக்கொள்ளலாம் எனத் தனது கடும் அதிருப்தியை வெளிப்படுத்தினார். கவுன்சிலர்கள் ஓராண்டாகப் போராடி கொண்டுவரும் திட்டங்களைச் சட்டமன்ற உறுப்பினர்கள் திறந்து வைப்பதாகவும், அதற்கு உழைத்த கவுன்சிலர்களுக்குத் தகவல் கூட தெரிவிக்கப்படுவதில்லை என்றும் மேயர் குற்றம் சாட்டினார்.
மேலும் முதலமைச்சர் ரிப்பன் மாளிகையில் நடத்தும் ஆய்வுக் கூட்டங்கள் குறித்துத் தனக்கு முன்கூட்டியே சரியான தகவல்கள் தெரிவிக்கப்படுவதில்லை என்றும் அவர் சுட்டிக்காட்டினார். இதற்குப் பதிலளித்த மாநகராட்சி ஆணையர் ஜி.எஸ்.சமீரன், அனைத்து மக்கள் பிரதிநிதிகளுக்கும் முன்னதாகவே அழைப்பு விடுக்க வேண்டும் என அதிகாரிகளுக்குத் தெளிவான சுற்றறிக்கை அனுப்பப்பட்டுள்ளதாகக் கூறினார்.
சென்னை மாநகராட்சியில் மேயர் மற்றும் கவுன்சிலர்களின் இந்தப் பகிரங்கப் பேச்சு அதிகாரிகளுடனான விரிசலை வெளிச்சத்திற்குக் கொண்டு வந்துள்ளது. தேர்ந்தெடுக்கப்பட்ட மக்கள் பிரதிநிதிகளின் உரிமைகளைப் பாதுகாக்க அரசு உரிய நடவடிக்கை எடுக்க வேண்டும் என்று மாமன்ற உறுப்பினர்கள் வலியுறுத்தியுள்ளனர்.
அரசு விழாக்கள் மற்றும் திட்டத் தொடக்க நிகழ்வுகளில் மரபுமுறைகள் சரியாகப் பின்பற்றப்படுவதை உறுதி செய்ய கூடுதல் கட்டுப்பாடுகள் விதிக்கப்படும் என எதிர்பார்க்கப்படுகிறது.
மாநகராட்சி ஆணையரின் சுற்றறிக்கை நகல் மாமன்றத்தில் சமர்ப்பிக்கப்பட்டு அடுத்தகட்ட நடவடிக்கைகள் தொடரும் எனத் தெரிகிறது.
