தமிழக முதலமைச்சரும், தமிழக வெற்றிக் கழகத்தின் (தவெக) தலைவருமான சி. ஜோசப் விஜய்யின் 52-வது பிறந்தநாள் விழா கடந்த ஜூன் 22-ஆம் தேதி தமிழகம் முழுவதும் தவெக நிர்வாகிகளால் விமரிசையாகக் கொண்டாடப்பட்டது. இந்த நிலையில், அரசுப் பள்ளிகள் மற்றும் கல்லூரிகளில் மாணவர்களைக் கொண்டு அரசியல் ஆதாயத்திற்காக முதலமைச்சரின் பிறந்தநாள் விழாக்கள் கொண்டாடப்பட்டதாகக் கூறி, கல்வி நிறுவனங்களில் இத்தகைய அரசியல் மற்றும் தனிநபர் புகழ்ச்சி நடவடிக்கைகளுக்குத் தடை விதிக்கக் கோரி சென்னை உயர்நீதிமன்றத்தில் அவசரப் பொதுநல வழக்கு (PIL) ஒன்று தொடரப்பட்டுள்ளது.
சென்னை மாநகராட்சியின் காங்கிரஸ் கவுன்சிலரும், வழக்கறிஞருமான வி. கவி கணேசன் தாக்கல் செய்துள்ள இந்த மனுவில், நாமக்கல் மாவட்டம் சௌதாபுரம் அரசு மேல்நிலைப்பள்ளியில் தவெக உள்ளூர் நிர்வாகி ஒருவர் தங்க நாணயங்கள் வழங்கும் விழாவை நடத்தியபோது, சுட்டெரிக்கும் வெயிலில் பள்ளி மாணவர்கள் நீண்ட நேரம் காத்திருக்க வைக்கப்பட்டதாகக் குற்றம் சாட்டியுள்ளார். மேலும், காஞ்சிபுரம் மற்றும் நாகப்பட்டினம் மாவட்டங்களில் உள்ள அரசுப் பள்ளிகளிலும் மாணவர்களைக் வகுப்பறையை விட்டு வெளியே அழைத்துச் சென்று, தவெக துண்டுகளை அணியச் செய்து “விஜய் வாழ்க” என அரசியல் கோஷங்களை எழுப்ப வைத்த சிசிடிவி (CCTV) வீடியோ ஆதாரங்களையும் மனுதாரர் நீதிமன்றத்தில் சமர்ப்பித்துள்ளார்.
அரசு மற்றும் தனியார் கல்வி நிறுவனங்கள் என்பவை மாணவர்களின் பகுத்தறிவை வளர்க்கும் நடுநிலையான இடங்களாக இருக்க வேண்டுமே தவிர, அரசியல் பிரச்சாரக் களமாக மாறக்கூடாது என மனுவில் சுட்டிக்காட்டப்பட்டுள்ளது. சுமார் 3,000 பள்ளி மாணவர்களைச் சுட்டெரிக்கும் வெயிலில் அமர வைத்து முதலமைச்சரின் மனித முக வடிவிலான உருவத்தை (Human Face Impression) உருவாக்கிய நிகழ்வு, மாணவர்களின் உடல்நலம் மற்றும் பாதுகாப்பைக் கேள்விக்குறியாக்கியுள்ளதாகப் பெற்றோர் மற்றும் சமூக ஆர்வலர்கள் மத்தியில் எழுந்த கண்டனங்களும் மனுவில் பதிவு செய்யப்பட்டுள்ளன.
கல்வி வளாகங்களுக்குள் அரசியல் கொடிகள், ஆடைகள் மற்றும் கோஷங்கள் கொண்டுவரப்படுவதைத் தடுக்க 2023-ஆம் ஆண்டின் தமிழ்நாடு தனியார் பள்ளிகள் ஒழுங்குமுறை விதிகளையும், தமிழ்நாடு கல்வி விதிகளையும் அரசு கண்டிப்புடன் அமல்படுத்த வேண்டும் என இந்த மனுவில் கோரப்பட்டுள்ளது. இந்த விவகாரம் பூதாகரமாக மாறியுள்ள சூழலில், பள்ளி கல்வித்துறை அமைச்சர் ஏற்கனவே இது போன்ற செயல்களில் ஈடுபடக் கூடாது என எச்சரித்திருந்த நிலையிலும் விதிகள் மீறப்பட்டுள்ளன. இந்த முக்கியப் பொதுநல வழக்கைச் சென்னை உயர்நீதிமன்றம் மிக விரைவில் விசாரணைக்கு எடுத்துக்கொள்ள உள்ளதால், தமிழக அரசியல் மற்றும் கல்வித்துறையில் பெரும் பரபரப்பு ஏற்பட்டுள்ளது.
