தமிழக முதலமைச்சர் சி. ஜோசப் விஜய் வரும் ஆகஸ்ட் 3-ஆம் தேதி கர்நாடகா சென்று அம்மாநில முதலமைச்சர் டி.கே. சிவகுமாருடன் காவிரி மற்றும் மேக்கேதாட்டு அணை விவகாரங்கள் குறித்து பேச்சுவார்த்தை நடத்தவுள்ளதாக வெளியாகியுள்ள தகவல்கள் அரசியல் வட்டாரத்தில் பெரும் பரபரப்பையும் எதிர்பார்ப்பையும் ஏற்படுத்தியுள்ளன. இரு மாநிலங்களுக்கு இடையேயான நீண்டகால நதிநீர் சிக்கல்களுக்குத் தீர்வு காணும் வகையில் இந்த உயர்மட்டச் சந்திப்பு அமையவுள்ளதாகக் கூறப்படுகிறது.
தஞ்சாவூரில் செய்தியாளர்களைச் சந்தித்த தமிழக வேளாண் மற்றும் உழவர் நலத்துறை அமைச்சர் ஆர். வினோத் இந்த பயண விவரங்களை உறுதிப்படுத்தியுள்ளார். “காவிரியின் குறுக்கே மேக்கேதாட்டு அண கட்ட கர்நாடக அரசு முயற்சிப்பதை தமிழக அரசு ஒருபோதும் அனுமதிக்காது; அது நமது உரிமை. நமது உரிமைகளைப் பாதுகாக்கவும், மேக்கேதாட்டு அணை கட்டுவதைத் தடுக்கவும் முதலமைச்சர் விஜய் ஆகஸ்ட் 3-ல் கர்நாடகா சென்று முக்கிய ஆலோசனையில் பங்கேற்கவுள்ளார்” என்று அமைச்சர் தெளிவுபடுத்தினார்.
அதேவேளையில், கர்நாடக அரசிடமிருந்து முதலமைச்சருக்கு அதிகாரப்பூர்வ அழைப்பு மட்டுமே விடுக்கப்பட்டுள்ளதாகவும், சந்திப்பின் நிகழ்ச்சி நிரல் மற்றும் எல்லைகள் குறித்து அமைச்சரவையில் ஆலோசிக்கப்பட்டு வருவதாகவும் தகவல்கள் வெளியாகி குழப்பத்தை ஏற்படுத்தின. இருப்பினும், தமிழ்நாட்டின் டெல்டா விவசாயிகளின் நலனைப் பாதுகாக்கவும், காவிரி நீரைக் கேட்டுப் பெறவும் முதலமைச்சரின் நேரடித் தலையீடு மிக அவசியமானது என்பதால் இந்த கர்நாடகப் பயணம் உறுதி செய்யப்பட்டுள்ளதாகத் துறை சார்ந்த வட்டாரங்கள் தெரிவிக்கின்றன.
காவிரி நீர் மேலாண்மை ஆணையத்தின் உத்தரவுப்படி வழக்கமாக வர வேண்டிய தண்ணீரை கர்நாடகா வழங்காத நிலையில், பல ஆண்டுகளுக்குப் பிறகு இரு மாநில முதலமைச்சர்கள் மட்டத்தில் நேரில் பேச்சுவார்த்தை நடத்தப்படவுள்ளது மிகப்பெரிய முக்கியத்துவம் பெறுகிறது. மேக்கேதாட்டு விவகாரத்தில் தமிழக அரசின் உறுதியான நிலைப்பாட்டை நேரில் வலியுறுத்தி, உரிய நீரைப் பெறுவதே முதலமைச்சர் விஜய்யின் இந்த பெங்களூரு பயணத்தின் முதன்மை நோக்கம் எனத் தெரிவிக்கப்பட்டுள்ளது.
