தமிழ்நாட்டில் காலியாக உள்ள மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் அக்டோபர் 6-ஆம் தேதி நடைபெறவுள்ள நிலையில், களம் தீவிரமடைந்துள்ளது. அதிமுகவில் இருந்து விலகி தவெகவில் இணைந்து வேட்பாளர்களாகக் களமிறங்கியுள்ள மரகதம் குமரவேல் மற்றும் பி.சத்தியபாமா ஆகியோரை ஆதரித்து, முதல்வர் விஜய் வரும் செப்டம்பர் 25 முதல் 4 நாட்கள் தீவிரப் பிரச்சாரம் மேற்கொள்ளத் திட்டமிட்டுள்ளார். இந்நிலையில், பிரச்சாரப் பயணத்திற்கு இடையே செப்டம்பர் 27-ஆம் தேதி முதல்வர் விஜய் கரூர் செல்ல வாய்ப்புள்ளதாக வெளியாகியுள்ள புதிய தகவல் அரசியல் வட்டாரத்தில் பெரும் பரபரப்பை ஏற்படுத்தியுள்ளது.
கடந்த ஆண்டு செப்டம்பர் 27-ஆம் தேதி கரூரில் நடைபெற்ற தவெக பிரச்சாரப் பொதுக்கூட்டத்தின் போது எதிர்பாராத விதமாக ஏற்பட்ட கூட்ட நெரிசலில் சிக்கி 41 பேர் பரிதாபமாக உயிரிழந்தனர். இந்தத் துயரச் சம்பவம் நடைபெற்று சரியாக ஓராண்டு நிறைவடைய உள்ள நிலையில், உயிரிழந்தவர்களின் குடும்பத்தினரை நேரில் சந்தித்து ஆறுதல் கூறவும், நினைவு அஞ்சலி செலுத்தவுமே முதல்வர் விஜய் கரூர் செல்லத் திட்டமிட்டுள்ளதாகக் கூறப்படுகிறது.
இடைத்தேர்தல் நடைபெறும் மதுராந்தகம் மற்றும் தாராபுரம் தொகுதிகளில் அதிமுக மற்றும் தவெக இடையே நேரடிப் போட்டி நிலவுகிறது. சொந்தக் கட்சி வேட்பாளர்கள் மீது தொகுதி மக்களிடையே நிலவும் சில அதிருப்திகளைப் போக்கவும், தவெகவின் சட்டமன்ற உறுப்பினர்கள் பலத்தை 107-ல் இருந்து 109 ஆக உயர்த்தவும் முதல்வர் விஜய்யின் இந்த 4 நாள் பிரசாரம் முக்கியத்துவம் வாய்ந்ததாகப் பார்க்கப்படுகிறது. அதேவேளையில், கரூர் துயரத்தின் முதலாண்டு நினைவையொட்டி அவர் கரூர் செல்வது உணர்வுப்பூர்வமான நகர்வாக அமையும் என அரசியல் விமர்சகர்கள் கருதுகின்றனர்.
இருப்பினும், முதல்வர் விஜய்யின் கரூர் பயணம் மற்றும் இடைத்தேர்தல் அதிகாரப்பூர்வப் பிரச்சார அட்டவணை குறித்த இறுதி அறிவிப்பு அரசு அல்லது தவெக தலைமைக் கழகத்தின் சார்பில் இன்னும் முறைப்படி வெளியிடப்படவில்லை. செப்டம்பர் 27-ஆம் தேதி கரூர் சம்பவத்தின் முதலாண்டு நினைவு தினம் என்பதால், அப்பயணம் குறித்த அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.
