இந்தியாவின் உச்சநீதிமன்ற தலைமை நீதிபதி சூர்யகாந்த், வேலைவாய்ப்பற்ற இளைஞர்களை “கரப்பான் பூச்சிகள்” (Cockroaches) மற்றும் “சமூகத்தின் ஒட்டுண்ணிகள்” என விமர்சித்ததாகக் கூறி, அதற்குப் போட்டியாக ‘காக்கரோச் ஜனதா கட்சி’ (CJP) என்ற நையாண்டி அரசியல் இயக்கம் சமூக வலைதளங்களில் தொடங்கப்பட்டது. ஆம் ஆத்மி கட்சியின் முன்னாள் அரசியல் மூலோபாயவாதி அபிஜீத் திப்கே என்பவரால் மே 16 அன்று தொடங்கப்பட்ட இந்த இயக்கம், வெறும் ஒரு வாரத்திற்குள் இன்ஸ்டாகிராமில் 20 மில்லியனுக்கும் அதிகமான பின்தொடர்பாளர்களைப் பெற்று பாஜக மற்றும் காங்கிரஸ் போன்ற முன்னணி கட்சிகளை முந்தியது.
இந்நிலையில், இந்த அமைப்பின் பெயரில் பெங்களூரு டவுன் ஹால் (Town Hall) பகுதியில் இன்று (மே 24) ஒரு அமைதியான மனிதச் சங்கிலிப் போராட்டத்திற்கு அழைப்பு விடுத்து சமூக வலைதளங்களில் போஸ்டர் ஒன்று வைரலானது. “இணையத்தில் மட்டுமல்ல, வீதிகளிலும் நம் சக்தியைக் காட்டுவோம்! அனைத்து கரப்பான் பூச்சிகளும் வாருங்கள்” என்ற வாசகங்களுடன், கரப்பான் பூச்சிகள் ‘நம்ம ஹக்கு’ (எங்கள் உரிமை) என்ற பதாகைகளை ஏந்தி சட்டமன்றத்தை நோக்கி அணிவகுப்பது போன்ற ஏஐ (AI) சித்திரங்கள் அந்த போஸ்டரில் இடம்பெற்றிருந்தன. இது சமூக ஊடகங்களில் காட்டுத்தீயாய் பரவி, இளைஞர்களிடையே விவாதத்தைக் கிளப்பியது.
இந்த வைரல் போஸ்டருக்கு பெங்களூரு மாநகர காவல்துறை உடனடியாக அதிரடி எச்சரிக்கையை விடுத்துள்ளது. இது தொடர்பாகப் பேசிய காவல்துறை அதிகாரிகள், டவுன் ஹால் பகுதியில் போராட்டம் நடத்த எந்தவொரு தனிநபரோ அல்லது அமைப்போ அனுமதி கோரவில்லை என்றும், அதற்கு அனுமதியும் வழங்கப்படவில்லை என்றும் தெளிவுபடுத்தியுள்ளனர். மேலும், கர்நாடக உயர் நீதிமன்ற உத்தரவின்படி பெங்களூருவில் ‘ஃப்ரீடம் பார்க்’ (Freedom Park) தவிர வேறு எங்கும் பொது இடங்களில் போராட்டங்கள் நடத்த சட்டப்படி அனுமதியில்லை என்றும் மீறினால் கடும் நடவடிக்கை எடுக்கப்படும் என்றும் எச்சரித்துள்ளனர்.
பொதுமக்கள் யாரும் இந்த போராட்ட போஸ்டரை ஃபேஸ்புக், வாட்ஸ்அப், இன்ஸ்டாகிராம் மற்றும் எக்ஸ் (X) தளங்களில் பகிரவோ, ஃபார்வர்டு செய்யவோ வேண்டாம் என்றும், டவுன் ஹால் பகுதியில் கூட வேண்டாம் என்றும் காவல்துறை கேட்டுக்கொண்டுள்ளது. ஏற்கனவே இந்த காக்கரோச் ஜனதா கட்சியின் அதிகாரப்பூர்வ எக்ஸ் கணக்கு இந்தியாவில் முடக்கப்பட்ட நிலையில், “அவர்கள் காத்திருக்கிறார்கள்; கரப்பான் பூச்சிகள் ஒருபோதும் அழிவதில்லை” என்ற வாசகங்களுடன் மாற்று கணக்குகளைத் தொடங்கி இந்த டிஜிட்டல் இளைஞர் பட்டாளம் தொடர்ந்து வேலைவாய்ப்பின்மை மற்றும் பணவீக்கத்திற்கு எதிராக இணையத்தில் ட்ரெண்ட் செய்து வருகிறது.
