அமெரிக்காவின் மியாமி சர்வதேச விமான நிலையத்தில் சனிக்கிழமை இரவு கோபா ஏர்லைன்ஸ் (Copa Airlines) பயணிகள் விமானமும், யுபிஎஸ் (UPS) சரக்கு விமானமும் ஓடுபாதையில் ஒன்றோடொன்று மோதி விபத்துக்குள்ளாகின. பனாமா சிட்டியில் இருந்து 166 பயணிகள் மற்றும் 6 பணியாளர்களுடன் வந்திறங்கிய கோபா ஏர்லைன்ஸ் போயிங் 737 விமானம் தனது நிறுத்துமிடத்தை நோக்கிச் சென்றபோது இந்த விபத்து ஏற்பட்டுள்ளது.
விமானப் போக்குவரத்துக் கட்டுப்பாட்டு அறை அதிகாரிகள் கோபா விமானத்திற்கு வழிவிடுமாறு சரக்கு விமானத்திற்கு அறிவுறுத்தியிருந்த போதிலும், யுபிஎஸ் போயிங் 767 சரக்கு விமானம் சற்று முன்னோக்கி நகர்ந்ததால் இரு விமானங்களும் உரசிக் கொண்டதாக அமெரிக்க மத்திய விமானப் போக்குவரத்து நிர்வாகம் (FAA) தெரிவித்துள்ளது. இந்த மோதலில் கோபா விமானத்தின் இடது இறக்கை முனை உடைந்து சேதமடைந்ததுடன், சரக்கு விமானத்தின் முன்பகுதியிலும் சேதம் ஏற்பட்டுள்ளது.
விபத்து நடந்த உடனேயே கட்டுப்பாட்டு அறையைத் தொடர்பு கொண்ட கோபா விமானி, “யாரோ எங்களை இடித்துவிட்டார்கள்” என்றும், “எங்கள் இடது இறக்கையின் முனைப் பகுதியைக் காணவில்லை” என்றும் கூறிய ஆடியோ பதிவு தற்போது வெளியாகியுள்ளது. இந்தச் சம்பவத்தில் இரண்டு பயணிகளுக்கு லேசான காயம் ஏற்பட்டுள்ள நிலையில், அவர்களுக்கு விமான நிலையத்திலேயே முதலுதவி அளிக்கப்பட்டதாகவும், மருத்துவமனையில் அனுமதிக்கப்பட வேண்டிய அவசியம் ஏற்படவில்லை என்றும் அதிகாரிகள் உறுதிப்படுத்தியுள்ளனர்.
விபத்திற்குள்ளான பயணிகள் விமானம் பாதுகாப்பாக நிறுத்துமிடத்திற்கு இழுத்துச் செல்லப்பட்டு, அதிலிருந்த அனைவரும் பத்திரமாக வெளியேற்றப்பட்டனர். இந்தச் சம்பவம் குறித்து அமெரிக்க விமானப் போக்குவரத்து நிர்வாகம் விரிவான விசாரணையைத் தொடங்கியுள்ள நிலையில், விசாரணைக்கு முழு ஒத்துழைப்பு வழங்குவதாக இரு விமான நிறுவனங்களும் அறிவித்துள்ளன.
