அமெரிக்காவின் தொடர்ச்சியான வான்வழித் தாக்குதல்களுக்குப் பிறகும், ஈரானிடம் இன்னும் 1,500 முதல் 2,500 வரையிலான ஏவுகணைகள் கையிருப்பில் இருப்பதாக அமெரிக்க உளவு அமைப்புகளின் புதிய மதிப்பீட்டில் தெரியவந்துள்ளது. ஈரானின் ஆயுதக் கிடங்குகள் பெருமளவில் அழிக்கப்பட்டுவிட்டதாக அமெரிக்கத் தலைவர்கள் கூறிவந்த நிலையில், ஈரானின் உண்மையான ராணுவ பலத்தைக் கணிப்பதில் உளவு அமைப்புகளுக்குச் சவால் ஏற்பட்டுள்ளதை இந்த அறிக்கை வெளிப்படுத்துகிறது.
மாதந்தோறும் சுமார் 50 பாலிஸ்டிக் ஏவுகணைகளை ஈரான் தொடர்ந்து உற்பத்தி செய்து வருவதாகவும், சுரங்கப் பாதைகள் மற்றும் ரகசியத் தளங்களில் ஏவுகணைகளைப் பாதுகாப்பாக வைத்திருப்பதாகவும் மேற்கத்திய உளவுத் தகவல்கள் தெரிவிக்கின்றன. இதுமட்டுமின்றி, கைப்பற்றப்பட்ட அமெரிக்க ஆயுதங்களின் தொழில்நுட்பங்களை ஆய்வு செய்து புதிய பாதுகாப்புக் கருவிகளை உருவாக்கி வருவதாக ஈரானின் புரட்சிகர பாதுகாப்புப் படை ஆலோசகர் பிரிகேடியர் ஜெனரல் அலி பலாலி தெரிவித்துள்ளார்.
மத்திய கிழக்கில் அமெரிக்க ராணுவ நடவடிக்கைகளுக்குச் சவால் விடும் வகையில், விண்வெளித் துறையிலும் ஈரான் வளர்ந்து வரும் சக்தியாக உருவெடுத்து வருவதாகப் பென்டகன் உளவு அறிக்கை சுட்டிக்காட்டியுள்ளது. ஹார்முஸ் நீரிணைப் பகுதியில் உள்ள 33 ஏவுகணைத் தளங்களில் 30 தளங்கள் இன்னும் செயல்பாட்டில் இருப்பதால், ஈரானின் தாக்குதல் திறன் குறையவில்லை என்பது சர்வதேச பாதுகாப்பு வட்டாரங்களில் விவாதத்தை ஏற்படுத்தியுள்ளது.
தற்போது அமெரிக்கா, சீனா மற்றும் ரஷ்யா ஆகிய நாடுகளின் தலைவர்கள் ஈரான் போர் விவகாரம் குறித்து ஆலோசனை நடத்தத் திட்டமிட்டுள்ள நிலையில், இந்த உளவுத் தகவல்கள் முக்கியத்துவம் பெற்றுள்ளன. ஈரானின் நிலத்தடி ஆயுதத் தளங்கள் மற்றும் ஏவுகணை உற்பத்தி மையங்களைத் தொடர்ந்து கண்காணிக்கும் பணிகளில் அமெரிக்கப் பாதுகாப்புத் துறை தீவிரமாக ஈடுபட்டுள்ளது.
