தனியார் பள்ளிகளுக்கான பாதுகாப்பு விதிமுறைகள் மற்றும் அங்கீகாரம் வழங்கும் நடைமுறைகளில் திமுக அரசு ஊழல் செய்துள்ளதாக தமிழக செய்தித் தொழில்நுட்ப மற்றும் சட்டத்துறை அமைச்சர் சி.டி.ஆர்.நிர்மல் குமார் குற்றம் சாட்டியுள்ளார். செய்தியாளர் சந்திப்பில் பேசிய அவர், 2003 கும்பகோணம் தீவிபத்து சம்பவத்திற்குப் பிறகு பள்ளிக் குழந்தைகளின் பாதுகாப்பிற்காகப் பல்வேறு கடுமையான சட்டங்கள் இயற்றப்பட்டதை நினைவுகூர்ந்தார். ஆனால் முன்னாள் அமைச்சர் அன்பில் மகேஷ் தலைமையிலான கல்வித்துறை, ஆயிரக்கணக்கான பள்ளிகளிடம் தரச் சான்றிதழ் வழங் இடைத்தரகர்களை நியமித்து பல கோடி ரூபாய் வசூல் செய்துள்ளதாகச் சாடினார்.
குழந்தைகளின் உயிருக்கும் பாதுகாப்புக்கும் மதிப்பளிக்காமல் சான்றிதழ்களை விற்பனை செய்து வியாபாரம் நடத்தியதாக திமுக தலைமை மீது அவர் கடுமையான விமர்சனங்களை முன்வைத்தார். 4,000 முதல் 5,000 பள்ளிகளிடம் ரூ.300 கோடி முதல் ரூ.400 கோடி வரை வசூலிக்கப்பட்டு ஊழல் நடந்துள்ளதாகக் குறிப்பிட்ட அவர், இதில் தொடர்புடைய முக்கிய நபர்கள் தலைமறைவாக உள்ளதாகவும் குற்றம் சாட்டினார். நாட்டின் எதிர்கால தூண்களான குழந்தைகளின் பாதுகாப்பில் சமரசம் செய்து பணம் பார்த்த இத்தகைய செயல்களில் ஈடுபட்ட திமுக தலைவர்கள் உடனடியாக அரசியலை விட்டு விலக வேண்டும் என்றும் அவர் வலியுறுத்தினார்.
தனியார் பள்ளிகள் அங்கீகார ஊழல் வழக்கில் முன்னாள் அமைச்சர் அன்பில் மகேஸுக்குத் தொடர்புடைய இடங்களில் மத்திய குற்றப்பிரிவு போலீசார் சோதனைகளை நடத்தி விசாரணை மேற்கொண்டு வரும் சூழலில், அமைச்சரின் இந்த குற்றச்சாட்டுகள் அரசியல் வட்டாரத்தில் எதிரொலித்து வருகின்றன. இந்த விவகாரம் குறித்து திமுக தரப்பிலிருந்து அளிக்கப்பட்ட விளக்கங்களில், இத்தகைய குற்றச்சாட்டுகள் அரசியல் உள்நோக்கம் கொண்டவை என்றும் சட்டரீதியாக இதை எதிர்கொள்வோம் என்றும் தெரிவிக்கப்பட்டுள்ளது.
தற்போது இந்த விவகாரம் தொடர்பான சட்டப்பூர்வ விசாரணைகளை மத்திய குற்றப்பிரிவு போலீசார் தீவிரப்படுத்தி வருகின்றனர்.வரும் நாட்களில் இக்குற்றச்சாட்டுகள் தொடர்பான கூடுதல் ஆதாரங்கள் மற்றும் விசாரணை விவரங்கள் வெளிவரும் என எதிர்பார்க்கப்படுகிறது.
