பிரிட்டனின் சவுதாம்ப்டன் (Southampton) பல்கலைக்கழகத்தில் படித்து வந்த 18 வயது நிதியியல் துறை (Finance Student) மாணவரான ஹென்றி நோவாக் கடந்த 2025 டிசம்பர் 3 அன்று கொடூரமாகக் குத்திப் படுகொலை செய்யப்பட்டார். இக்குற்றத்திற்காக 23 வயது சீக்கிய இளைஞரான விக்ரம் திக்வாவிற்கு (Vickrum Digwa) ஆயுள் தண்டனை விதிக்கப்பட்டு, அவர் குறைந்தது 21 ஆண்டுகள் சிறையில் இருக்க வேண்டும் எனச் சவுதாம்ப்டன் நீதிமன்றம் கடந்த ஜூன் 1 அன்று தீர்ப்பளித்தது. ஆனால், இந்தக் கொடூரக் குற்றத்திற்கு இந்தத் தண்டனை “மிகவும் குறைவானது” (Unduly Lenient) என பிரிட்டன் பொதுமக்களும் சட்ட வல்லுநர்களும் கொந்தளித்ததை அடுத்து, இந்தத் தண்டனை காலத்தை உயர்த்துவது குறித்து மேல்முறையீட்டு நீதிமன்றம் (Court of Appeal) தற்பொழுது அதிகாரப்பூர்வ மறுஆய்வை மேற்கொண்டுள்ளது.
பிரிட்டனின் சொலிசிட்டர் ஜெனரல் எல்லி ரீவ்ஸ் (Ellie Reeves KC), விக்ரம் திக்வாவின் 21 ஆண்டுச் சிறைத்தண்டனையை ‘மிகவும் மென்மையானது’ என வகைப்படுத்தி, வழக்கை மேல்முறையீட்டு நீதிமன்றத்திற்கு அதிரடியாக மாற்றியுள்ளார். “இந்தக் கொடூரச் சம்பவம் என்னையும் ஒட்டுமொத்த பிரிட்டிஷ் பொதுமக்களையும் பேரதிர்ச்சியில் ஆழ்த்தியுள்ளது. பாதிக்கப்பட்ட ஹென்றியின் குடும்பத்தினருக்கு முறையான நீதி கிடைக்க வேண்டும்” என்று எல்லி ரீவ்ஸ் தெரிவித்துள்ளார். கொலையாளி விக்ரம் திக்வா தனது மத நம்பிக்கையின்படி கையில் வைத்திருந்த 21 சென்டிமீட்டர் நீளமுள்ள கிர்பான் (Kirpan) கத்தியால், மாணவன் ஹென்றியை நெஞ்சிலும் கால்களிலும் 5 முறை கொடூரமாகக் குத்தி வன்கொடுமை செய்தது விசாரணையில் நிரூபிக்கப்பட்டுள்ளது.
இவ்வழக்கு பிரிட்டனில் மாபெரும் மக்கள் போராட்டமாகவும், உலகளவில் எலான் மஸ்க் மற்றும் அமெரிக்கத் துணை அதிபர் ஜே.டி. வேன்ஸ் உள்ளிட்டோரின் விவாதப் பொருளாகவும் மாற மிக முக்கியக் காரணம், சம்பவ இடத்திற்கு வந்த காவல்துறையினரின் அலட்சியப் போக்குதான். கொலையாளி விக்ரம் திக்வா, தன்னை ஹென்றி இனவெறியுடன் தாக்கினார் எனப் போலீசாரிடம் பொய் புகார் அளித்தார். இதனை நம்பிய ஹாம்ப்ஷயர் போலீசார் (Hampshire Police), ரத்த வெள்ளத்தில் உயிருக்குப் போராடிக் கொண்டு “என்னை கத்தியால் குத்திவிட்டார்கள், என்னால் மூச்சுவிட முடியவில்லை” என்று கதறிய 18 வயது ஹென்றியைக் குற்றவாளி போலக் கருதி கையில் விலங்கு (Handcuffs) மாட்டித் தரையில் அமுக்கினர்.
போலீசாரின் இந்தத் தவறான அணுகுமுறையால் சுமார் 3 நிமிடங்கள் ஹென்றிக்கு எந்த முதலுதவியும் கிடைக்காமல், அவர் சம்பவ இடத்திலேயே மூச்சுத்திணறிப் பரிதாபமாக உயிரிழந்தார். இந்த அதிர்ச்சியூட்டும் போலீஸ் பாடிகேமரா (Bodycam) வீடியோக்கள் வெளியாகி பிரிட்டன் முழுவதும் வன்முறைப் போராட்டங்களை வெடிக்கச் செய்தன. ஆரம்பத்தில் 25 ஆண்டுகள் சிறைத்தண்டனை கோரப்பட்ட நிலையில், விக்ரம் திக்வாவின் வழக்கறிஞர் இது திட்டமிட்ட கொலை அல்ல, மதக் கத்தியை தற்காப்புக்காகப் பயன்படுத்தினார் என்று வாதிட்டுத் தண்டனையை 21 ஆண்டுகளாகக் குறைத்திருந்தார். தற்பொழுது பிரிட்டன் அரசின் அதிரடி தலையீட்டால், விக்ரம் திக்வாவின் சிறைத்தண்டனை 30 ஆண்டுகளுக்கும் மேலாக உயர்த்தப்பட அதிக வாய்ப்புள்ளதாக லண்டன் ஊடகங்கள் செய்தி வெளியிட்டுள்ளன.
