ஆப்கானிஸ்தானுக்கு எதிரான வரவிருக்கும் 3 போட்டிகள் கொண்ட டி20 தொடருக்கு முன்னதாக, இந்திய அணியின் தலைமைப் பயிற்சியாளர் கௌதம் கம்பீரின் அதிரடி முடிவுகளால் இந்திய கிரிக்கெட் அணியில் சலசலப்பு ஏற்பட்டுள்ளது. டி20 போட்டிகளில் அணியின் முக்கிய விக்கெட் கீப்பர்-பேட்டராக விளங்கிய இஷான் கிஷனைத் தொடரிலிருந்து ஓரங்கட்ட அணி நிர்வாகம் முடிவு செய்துள்ளதாகவும், அவருக்குப் பதிலாகச் சஞ்சு சாம்சன் மற்றும் பிரப்சிம்ரன் சிங் ஆகியோருக்கு முன்னுரிமை அளிக்கப்படவுள்ளதாகவும் தகவல்கள் வெளியாகியுள்ளன.
இஷான் கிஷன் சமீப காலமாக டி20 கிரிக்கெட்டில் அதிரடியாக ஆடாமல், அரைசதம் அடிக்க 30-க்கும் மேற்பட்ட பந்துகளை எடுத்துக்கொள்வது அணிக்கு பின்னடைவாகக் கருதப்படுகிறது. அதேவேளையில், அணித் தேர்வின் போது பயிற்சியாளர் கம்பீரின் கருத்துக்களுக்கு எதிராக இஷான் கிஷன் தனது அதிருப்தியை வெளிப்படுத்தியதாகக் கூறப்படும் சம்பவம், பயிற்சியாளரை அதிருப்தியடையச் செய்துள்ளது. கம்பீரின் இந்த அதிரடி முடிவுக்கு பிசிசிஐ தரப்பிலும் ஆதரவு இருப்பதாகத் தெரிகிறது.
மேலும், இந்திய அணியின் டாப்-ஆர்டரில் (Top Order) இடது கை பேட்டர்கள் மட்டுமே அதிகமாக இருப்பது எதிரணி பந்துவீச்சாளர்களுக்குச் சாதகமாக அமைகிறது. இதனால், டாப்-ஆர்டரில் வலது கை பேட்டர்களான சஞ்சு சாம்சன் மற்றும் பஞ்சாப் கிங்ஸ் வீரர் பிரப்சிம்ரன் சிங்கை முதன்மை விக்கெட் கீப்பர்களாகக் களம் இறக்கப் பயிற்சியாளர் கம்பீர் திட்டமிட்டுள்ளார். இதன் மூலம் சஞ்சு சாம்சனுக்கு ஒன்-டவுன் (No. 3) இடத்தில் நிலையான வாய்ப்பு கிடைக்கக்கூடும் எனக் எதிர்பார்க்கப்படுகிறது.
ஏற்கனவே ரஞ்சி கோப்பை மற்றும் உள்நாட்டுப் போட்டிகளைப் புறக்கணித்த காரணத்தால் பிசிசிஐயின் மத்திய ஒப்பந்தத்திலிருந்து நீக்கப்பட்டு, பின்னர் நீண்ட போராட்டத்திற்குப் பிறகே இஷான் கிஷன் மீண்டும் இந்திய அணியில் இடம் பிடித்திருந்தார். தற்போது மீண்டும் பயிற்சியாளருடன் எழுந்த கருத்து வேறுபாடு மற்றும் ஃபார்ம் குறைபாடு காரணமாக அவர் பிளேயிங் லெவனில் இருந்து ஓரங்கட்டப்படுவது, அவரது சர்வதேச கிரிக்கெட் வாழ்க்கைக்குப் பெரும் சவாலாக உருவெடுத்துள்ளது.
