ஈரானில் இருமடங்காக உயர்ந்த மரண தண்டனைகள்; அம்னெஸ்டி அறிக்கையால் அதிர்ந்துபோன உலக நாடுகள்!

அம்னெஸ்டி இன்டர்நேஷனல் அமைப்பு நேற்று வெளியிட்டுள்ள ‘மரண தண்டனைகள் 2025’ (Death Sentences and Executions 2025) என்ற தங்களின் வருடாந்திர அறிக்கையில், கடந்த ஆண்டில் மட்டும் உலகளவில் 2,707 பேருக்கு மரண தண்டனை நிறைவேற்றப்பட்டுள்ளதாகத் தெரிவித்துள்ளது. இது 2024-ஆம் ஆண்டில் பதிவான 1,518 என்ற எண்ணிக்கையை விட 78 சதவீதம் அதிகமாகும். உலகளவில் மரண தண்டனையை ஒழிப்பதற்கான முயற்சிகள் தொடர்ந்து வரும் நிலையிலும், ஒரு சில நாடுகள் தங்களது அதிகார பலத்தைக் காட்டவும், பொதுமக்களை அச்சுறுத்தவும் மரண தண்டனையை ஆயுதமாகப் பயன்படுத்தி வருவதாக அந்த அமைப்பு கவலை தெரிவித்துள்ளது.

இந்த அதிர வைக்கும் உலகளாவிய உயர்வுக்கு முக்கியக் காரணியாக ஈரான் விளங்குகிறது. கடந்த 2024-ஆம் ஆண்டில் ஈரானில் குறைந்தது 972 பேருக்கு மரண தண்டனை நிறைவேற்றப்பட்ட நிலையில், 2025-இல் இந்த எண்ணிக்கை இருமடங்கிற்கும் மேலாக அதிகரித்து 2,159 ஆக உயர்ந்துள்ளது. இது 1981-ஆம் ஆண்டிற்குப் பிறகு ஈரானில் பதிவான மிக உயர்ந்த எண்ணிக்கையாகும். ஈரானில் நிறைவேற்றப்பட்ட மொத்த மரண தண்டனைகளில் சுமார் பாதியளவு (998 வழக்குகள்) போதைப்பொருள் கடத்தல் தொடர்பான குற்றங்களுக்காக வழங்கப்பட்டவை என்றும், அரசியல் அதிருப்தியாளர்களை ஒடுக்கவே இந்தத் தண்டனைகள் ரகசியமாக நிறைவேற்றப்பட்டதாகவும் மனித உரிமை ஆர்வலர்கள் குற்றம் சாட்டுகின்றனர்.

ஈரானைத் தவிர்த்துச் சவூதி அரேபியாவில் 356 பேருக்கும், அமெரிக்காவில் 47 பேருக்கும் மரண தண்டனை நிறைவேற்றப்பட்டுள்ளது. குவைத், எகிப்து, சிங்கப்பூர் ஆகிய நாடுகளிலும் முந்தைய ஆண்டுகளை விட மரண தண்டனைகளின் எண்ணிக்கை கணிசமாக உயர்ந்துள்ளது. உலகிலேயே அதிகப்படியாகச் சீனாவில் ஆயிரக்கணக்கானோருக்கு மரண தண்டனை வழங்கப்பட்டிருக்கலாம் என நம்பப்பட்டாலும், அந்நாடு இதுகுறித்த விவரங்களை ‘அரசின் ரகசியம்’ என வகைப்படுத்தி மறைத்து வருவதால் அதிகாரப்பூர்வ உலகளாவிய பட்டியலில் சீனாவின் முழுமையான தரவுகள் சேர்க்கப்படவில்லை.

இதுகுறித்து அம்னெஸ்டி இன்டர்நேஷனல் அமைப்பின் பொதுச்செயலாளர் ஆக்னஸ் காலமார்ட் (Agnès Callamard) கூறுகையில், “உலக நாடுகள் பல மரண தண்டனையை ஒழித்து வரும் சூழலில், ஒரு சில நாடுகள் மட்டும் மனித உரிமைகளைப் பொருட்படுத்தாமல் இத்தகைய கொடூரங்களில் ஈடுபட்டு வருகின்றன. குறிப்பாக விளிம்புநிலை மக்கள் மற்றும் சிறுபான்மையினரைக் குறிவைத்து இந்தத் தண்டனைகள் நிறைவேற்றப்படுகின்றன” என்று சாடியுள்ளார். உலகளவில் சுமார் 70 சதவீதத்திற்கும் அதிகமான நாடுகள் மரண தண்டனையைச் சட்டப்பூர்வமாகவோ அல்லது நடைமுறையிலோ ஒழித்துள்ள நிலையில், எஞ்சிய நாடாளுமன்றங்களும் இந்த மனிதாபிமானமற்ற முறையை முழுமையாகக் கைவிட வேண்டும் என்ற கோரிக்கை வலுத்துள்ளது.