அமெரிக்க அதிபர் டொனால்ட் டிரம்ப், ஈரானின் எண்ணெய் உள்கட்டமைப்புகள் மற்றும் குழாய் இணைப்புகளைக் குறிவைத்து ராணுவத் தாக்குதல் நடத்தப்படும் என மிரட்டல் விடுத்திருந்தார். இதற்குப் பதிலடி கொடுக்கும் வகையில் ஈரானின் துணைத் தலைவர் இஸ்மாயில் சகாப் எஸ்பஹானி (Esmail Saghab Esfahani), வளைகுடா நாடுகளுக்குப் பகிரங்க எச்சரிக்கை விடுத்துள்ளார். “எங்கள் நாட்டின் எண்ணெய் கிணறுகள் அல்லது உள்கட்டமைப்புகள் மீது தாக்குதல் நடத்த அமெரிக்காவிற்கு ஆதரவு அளிக்கும் நாடுகளின் அதே உள்கட்டமைப்புகள் மீது நான்கு மடங்கு சேதத்தை நாங்கள் ஏற்படுத்துவோம். எங்களது கணக்கு வேறு; எங்களுக்கு ஒரு எண்ணெய் கிணறு என்பது நான்கு எண்ணெய் கிணறுகளுக்குச் சமம்” என்று அவர் தனது ‘எக்ஸ்’ (X) பதிவில் குறிப்பிட்டுள்ளார்.
இந்த மோதலின் பின்னணியில், டொனால்ட் டிரம்ப் ஈரானின் எண்ணெய் ஏற்றுமதியை முடக்கும் வகையில் ‘கடற்படை முற்றுகையை’ (Naval Blockade) தீவிரப்படுத்தியுள்ளார். இது நீடித்தால் அடுத்த மூன்று நாட்களில் ஈரானின் எண்ணெய் குழாய் இணைப்புகள் வெடிக்கும் நிலையை எட்டும் என்று டிரம்ப் எச்சரித்திருந்தார். இதற்குப் பதிலடியாகவே, அமெரிக்காவிற்குத் தளம் வழங்கும் அல்லது ஆதரவு அளிக்கும் அண்டை நாடுகள் மீது தாக்குதல் நடத்துவோம் என ஈரான் மிரட்டியுள்ளது. குறிப்பாக சவுதி அரேபியா, ஐக்கிய அரபு அமீரகம் மற்றும் கத்தார் போன்ற நாடுகள் இந்த “நான்கு மடங்கு” பதிலடி அச்சுறுத்தலால் பெரும் கவலையில் ஆழ்ந்துள்ளன.
போர் ஒருபுறம் தீவிரமடைந்தாலும், சமாதானப் பேச்சுவார்த்தைகளுக்கான முயற்சிகளும் ஒருபுறம் நடந்து வருகின்றன. ஈரான் தற்போது “இரண்டு கட்டத் திட்டம்” (Two-stage plan) ஒன்றை பாகிஸ்தான் மூலம் அமெரிக்காவிற்கு அனுப்பியுள்ளது. அதன்படி, முதலில் ஹார்முஸ் ஜலசந்தியைத் திறந்து போரை நிறுத்துவது, அதன் பிறகு அணுசக்தி தொடர்பான பேச்சுவார்த்தைகளைத் தொடங்குவது என ஈரான் முன்மொழிந்துள்ளது. இருப்பினும், அதிபர் டிரம்ப் “ஈரான் அணு ஆயுதம் பெறக்கூடாது” என்பதில் பிடிவாதமாக உள்ளதால், இந்தச் சமாதானத் திட்டம் நிறைவேறுமா என்பதில் சந்தேகம் நீடிக்கிறது. ஈரானிய வெளியுறவு அமைச்சர் அப்பாஸ் அரக்சி தற்போது ரஷ்ய அதிபர் புதினைச் சந்தித்து இது குறித்து ஆலோசனை நடத்தி வருகிறார்.
தற்போது (ஏப்ரல் 27, 2026), மத்திய கிழக்கில் நிலவும் இந்த ‘இரட்டை முற்றுகை’ (அமெரிக்காவின் கடற்படை முற்றுகை மற்றும் ஈரானின் ஜலசந்தி மூடல்) உலகப் பொருளாதாரத்தைப் பதம் பார்த்து வருகிறது. போரினால் இதுவரை ஈரானிற்கு சுமார் 300 பில்லியன் டாலர் வரை இழப்பு ஏற்பட்டுள்ளதாக மதிப்பிடப்பட்டுள்ளது. ஒருவேளை ஈரான் தனது “நான்கு மடங்கு” எச்சரிக்கையைச் செயல்படுத்தினால், அது உலகளாவிய எரிசக்தி விநியோகத்தை முழுமையாக முடக்கி, உலகையே மிகப்பெரிய பொருளாதார நெருக்கடிக்குத் தள்ளும் என நிபுணர்கள் எச்சரிக்கின்றனர்.
