அமெரிக்கா மற்றும் இஸ்ரேல் படைகளின் அதிரடித் தாக்குதலால் முடக்கப்பட்டதாகக் கருதப்பட்ட ஈரானின் நிலத்தடி ஏவுகணைத் தளங்கள், தற்போது ரகசியமாகச் சீரமைக்கப்பட்டு வரும் அதிர்ச்சியூட்டும் தகவல்கள் செயற்கைக்கோள் புகைப்படங்கள் மூலம் அம்பலமாகியுள்ளன. அமைதிப் பேச்சுவார்த்தைக்காகக் கொடுக்கப்பட்ட அவகாசத்தைப் பயன்படுத்திக் கொண்டு, ஈரானின் தப்ரிஸ் (Tabriz) மற்றும் கொமெய்ன் (Khomeyn) ஆகிய பகுதிகளில் உள்ள ஏவுகணைத் தளங்களின் நுழைவு வாயில்களில் குவிந்துள்ள இடிபாடுகளை ஈரான் அகற்றி வருகிறது. அமெரிக்காவின் ‘எபிக் ஃபியூரி’ (Epic Fury) தாக்குதலால் ஈரானின் ஏவுகணைத் திட்டம் முழுமையாக முடக்கப்பட்டுவிட்டதாகக் கூறப்பட்ட நிலையில், இந்தச் செய்தி சர்வதேச அளவில் பெரும் பரபரப்பைக் கிளப்பியுள்ளது.
அமெரிக்க உளவுத்துறையின் மதிப்பீட்டின்படி, ஈரானின் ஏவுகணை ஏவுதளங்களில் சுமார் 50 சதவீதம் இன்னும் சேதமடையாமல் அப்படியே உள்ளன. நிலத்தடித் தளங்களுக்குள் ஏவுகணைகளைச் சிறைவைக்க அமெரிக்கா மேற்கொண்ட திட்டங்களைத் தவிடுபொடியாக்கி, ஈரான் மீண்டும் தனது தாக்குதல் திறனைப் புதுப்பித்து வருகிறது. இது ஒருபுறமிருக்க, உலக வர்த்தகத்தின் முக்கியப் பாதையான ‘பாப் அல்-மண்டேப்’ (Bab al-Mandab) நீரிணையைத் தனது ஹவுதி ஆதரவுப் படைகள் மூலம் முடக்கப்போவதாக ஈரான் பகிரங்கமாக எச்சரித்துள்ளது. ‘கண்ணீர் வாசல்’ (Gate of Tears) என்று அழைக்கப்படும் இந்த வழித்தடம் வழியாகவே உலகின் 10 சதவீத வர்த்தகம் நடைபெறுகிறது என்பது குறிப்பிடத்தக்கது.
தற்போது பெர்சிய வளைகுடாவில் உள்ள ஈரான் துறைமுகங்களுக்குச் செல்லும் கப்பல்களை அமெரிக்கா முழுமையாக முற்றுகையிட்டுள்ளது. ஹார்முஸ் நீரிணையில் (Strait of Hormuz) ஈரானுடன் தொடர்புடைய கப்பல்கள் செல்வதற்கு அமெரிக்கப் படைகள் கடும் தடை விதித்துள்ளன. இந்த முற்றுகையின் முதல் 24 மணிநேரத்தில் சில கப்பல்கள் தப்பிக்க முயன்றாலும், அமெரிக்கக் கடற்படையின் எச்சரிக்கையைத் தொடர்ந்து அவை பின்வாங்கியுள்ளன. ஈரான் இந்த நீரிணையைத் திறந்து விடுவதாக ஒப்புக்கொண்டதுதான் போர் நிறுத்தத்திற்கான முக்கிய நிபந்தனையாக இருந்தது. ஆனால், அந்த நிபந்தனையை ஈரான் மீறியதாலேயே இந்த முற்றுகை தீவிரப்படுத்தப்பட்டுள்ளது.
இந்த இக்கட்டான சூழ்நிலையிலும், அமெரிக்க அதிபர் டிரம்ப் ஈரான் போர் “விரைவில் முடிவுக்கு வரும்” என்று நம்பிக்கை தெரிவித்துள்ளார். அடுத்த இரண்டு நாட்களில் முக்கியப் பேச்சுவார்த்தைகள் நடைபெறும் என்று அவர் சூசகமாகத் தெரிவித்துள்ள போதிலும், ஈரான் தனது நிலத்தடித் தளங்களைச் சீரமைப்பது நிலைமையை மீண்டும் சிக்கலாக்கியுள்ளது. ஒருவேளை ஈரான் தனது ஏவுகணைத் தளங்களை முழுமையாகச் சரிசெய்துவிட்டால், போர் நிறுத்த ஒப்பந்தம் கேள்விக்குறியாகி, மீண்டும் ஒரு பயங்கரமான மோதலுக்கு மத்திய கிழக்கு நாடுகள் தள்ளப்படும் அபாயம் ஏற்பட்டுள்ளது.
