ஈரானிய ஆட்சியைக் கவிழ்க்கும் நோக்கத்துடன் அமெரிக்க கருவூலத் துறை வரலாறு காணாத வகையிலான மிகக் கடுமையான நிதி மற்றும் பொருளாதாரத் தடைகளை விதிப்பதாக அறிவித்துள்ளது. அமெரிக்க அதிபர் டொனால்ட் டிரம்பின் எச்சரிக்கையைத் தொடர்ந்து, ஈரான் மீது புதிய பொருளாதாரக் கட்டுப்பாடுகளை அமல்படுத்த அமெரிக்கா தீவிரமடைந்துள்ளது. அமெரிக்காவின் இந்த நடவடிக்கைக்கு ஈரான் அரசு மற்றும் அந்நாட்டு இராணுவம் கடும் கண்டனத்தையும் பலத்த எச்சரிக்கையையும் விடுத்துள்ளன.
அமெரிக்காவின் புதிய அச்சுறுத்தல்களுக்கு ஈரானின் பதில் நடவடிக்கை “மிகக் கொடூரமானதாகவும் பேரழிவை ஏற்படுத்துவதாகவும் இருக்கும்” என்று ஈரானிய ஆயுதப் படைகளின் தலைமைத் தளபதி மேஜர் ஜெனரல் அலி அப்தொல்லாஹி தெரிவித்துள்ளார். தங்களது தரைப்படை, கடற்படை, வான்படை, வான் பாதுகாப்பு மற்றும் சைபர் பாதுகாப்பு அமைப்புகள் அனைத்தும் முழு தயார் நிலையில் உள்ளதாகவும், எதிரியின் எந்தவொரு புதிய தாக்குதலுக்கும் பழிவாங்கும் வகையில் வீரியமான பதிலடி கொடுக்கப்படும் என்றும் அவர் எச்சரித்துள்ளார்.
அமெரிக்க கருவூலச் செயலாளர் ஸ்காட் பெசென்ட், ஈரான் உடனான வர்த்தகத் தொடர்புகளை முழுமையாகத் துண்டிக்கும் புதியத் தடைகளின் விவரங்களை விரைவில் வெளியிடவுள்ளதாகக் கூறியுள்ளார். ஈரானுடன் வணிகத்தில் ஈடுபடும் மற்றும் ஆதரவளிக்கும் நாடுகளுக்கும் கடுமையான பொருளாதாரப் பின்விளைவுகள் ஏற்படும் என வஷிங்டன் எச்சரித்துள்ள சூழலில், ஈரானிய வெளியுறவு அமைச்சகம் இதனை “பொருளாதார பயங்கரவாதம்” மற்றும் மனிதகுலத்திற்கு எதிரான குற்றம் எனச் சாடியுள்ளது.
இராணுவ ரீதியிலான நேரடி மோதலில் வெற்றி பெற முடியாது என்பதால், அமெரிக்காவும் இஸ்ரேலும் இத்தகையப் பொருளாதார மற்றும் உளவியல் போரில் ஈடுபட்டு வருவதாக செய்தியின் வழிகாட்டுதலின்படி ஈரானிய நாடாளுமன்ற சபாநாயகர் முகமது பாகர் காலிபாஃப் குற்றம் சுமத்தியுள்ளார். ஏற்கனவே ஈரானின் எண்ணெய் ஏற்றுமதி வெகுவாகப் பாதிக்கப்பட்டுள்ள நிலையில், இரு நாடுகளுக்கு இடையே தீவிரமடைந்து வரும் இந்த புதிய மோதல் உலகளாவிய கச்சா எண்ணெய் சந்தையிலும் சர்வதேச அரசியல் களத்திலும் பெரும் பதற்றத்தை ஏற்படுத்தியுள்ளது
