லெபனானில் இருந்து படைகள் பின்வாங்காது: அலி தஹேர் குன்றைக் கைப்பற்றி இஸ்ரேல் பாதுகாப்பு அமைச்சர் கெட்ஸ் கெடு!

தெற்கு லெபனான் எல்லைப் பகுதியில் அமைந்த வியூக முக்கியத்துவம் வாய்ந்த ‘அலி தஹேர்’ (Ali Tahar / Ali al-Taher Ridge) குன்றுப் பகுதியை இஸ்ரேலிய ராணுவம் தங்களது முழுமையான கட்டுப்பாட்டிற்குள் கொண்டுவந்துள்ளதாக அறிவித்துள்ளது. இதைத் தொடர்ந்து, ஹிஸ்புல்லா அமைப்பு முழுமையாகக் கலைக்கப்பட்டு ஆயுதங்களைக் கீழே போடும் வரை, தெற்கு லெபனானில் அமைக்கப்பட்டுள்ள தங்களின் ‘பாதுகாப்பு மண்டலத்திலிருந்து’ (Security Zone) இஸ்ரேல் ராணுவம் எக்காரணத்தைக் கொண்டும் பின்வாங்காது என்று இஸ்ரேல் பாதுகாப்புத் துறை அமைச்சர் இஸ்ரேல் கெட்ஸ் (Israel Katz) வெள்ளிக்கிழமை (செப்டம்பர் 04) அதிரடியாக அறிவித்துள்ளார்.

இஸ்ரேலிய ராணுவம் தெற்கு லெபனானில் நடத்திய தீவிரத் தாக்குதல்களின் தொடர்ச்சியாக, எல்லையிலிருந்து சுமார் 10 கிலோமீட்டர் தொலைவில் உள்ள அலி தஹேர் குன்றைப் படையினர் முழுமையாகக் கைப்பற்றியுள்ளனர். இக்குன்றின் தரைப்பகுதி மற்றும் நிலத்தடிப் பகுதியில் ஹிஸ்புல்லா அமைப்பால் கட்டப்பட்டிருந்த கட்டளை மையங்கள் மற்றும் பரந்த அளவிலான சுரங்கப் பாதைகள் அனைத்தும் இஸ்ரேலியப் படைகளால் தரைமட்டமாக்கப்பட்டுள்ளதாகக் கூறப்படுகிறது. இக்குன்றைக் கைப்பற்றியதன் மூலம் தெற்கு லெபனானில் பாதுகாப்பு மண்டலத்தை உறுதிப்படுத்தும் கட்டம் நிறைவடைந்துள்ளதாக அமைச்சர் கெட்ஸ் தனது அறிக்கையில் சுட்டிக்காட்டியுள்ளார்.

பிரதமர் பெஞ்சமின் நெதன்யாகு மற்றும் தாம் இணைந்து வகுத்துள்ள கொள்கையை விளக்கிய அமைச்சர் கெட்ஸ், “வடக்கு இஸ்ரேல் மக்களுக்கு எதிரான் அச்சுறுத்தல்கள் முற்றிலும் அகற்றப்படும் வரையிலும், தெற்கு லெபனான் பகுதிகள் முழுமையாகத் தூய்மைப்படுத்தப்படும் வரையிலும் இஸ்ரேலிய ராணுவம் இங்கேயே முகாமிட்டிருக்கும்; லெபனானில் மட்டுமல்லாமல் சிரியா மற்றும் காசாவிலும் அமைக்கப்பட்ட பாதுகாப்பு மண்டலங்களிலிருந்து இஸ்ரேல் ஒருபோதும் பின்வாங்காது” எனத் தெள்ளத்தெளிவாகத் தெரிவித்துள்ளார்.

ஐக்கிய நாடுகள் சபையின் மத்தியஸ்தத்துடன் சர்வதேச அமைதிப் பேச்சுவார்த்தைகள் மற்றும் போர்நிறுத்த ஒப்பந்த முயற்சிகள் தீவிரமடைந்து வரும் நிலையிலும், இஸ்ரேலின் இந்த “பின்னடைவு இல்லை” என்ற பிடிவாதமான நிலைப்பாடு மத்திய கிழக்கு பிராந்தியத்தில் பெரும் பதற்றத்தை ஏற்படுத்தியுள்ளது. வான்வழித் தாக்குதல்கள் மற்றும் தரைவழி ஆக்கிரமிப்பால் ஏற்கனவே நிலைகுலைந்துள்ள லெபனான் மக்களுக்கு, இஸ்ரேலின் இந்த நீண்டகால ராணுவ ஆக்கிரமிப்பு அறிவிப்பு கூடுதல் அதிர்ச்சியையும் கவலையையும் அளித்துள்ளது.