அமெரிக்காவின் மறைந்த தொழிலதிபரும், சிறுமிகளை பாலியல் கடத்தல் செய்த குற்றவாளியுமான ஜெப்ரி எப்ஸ்டீனின் (Jeffrey Epstein) வழக்கில், அவரது தனிப்பட்ட சொகுசு விமானத்தின் முன்னாள் விமானி லாரி விசோஸ்கி (Larry Visoski) அளிக்கவிருக்கும் புதிய சாட்சியங்கள் இந்த மர்ம வழக்கை முழுமையாக உடைக்கக்கூடும் என்று எதிர்பார்க்கப்படுகிறது. ‘லோலிதா எக்ஸ்பிரஸ்’ (Lolita Express) என்று அழைக்கப்படும் அந்த விமானத்தில் பயணித்த விஐபிக்கள் மற்றும் கடத்தப்பட்ட சிறுமிகள் குறித்த முக்கிய ரகசியங்கள் இதன் மூலம் வெளியாகலாம்.
கிட்டத்தட்ட முப்பது ஆண்டுகளாக எப்ஸ்டீனிடம் தலைமை விமானியாகப் பணியாற்றிய லாரி விசோஸ்கி, எப்ஸ்டீன் மற்றும் அவரது கூட்டாளி கிஸ்லெய்ன் மேக்ஸ்வெல் (Ghislaine Maxwell) ஆகியோரின் பாலியல் கடத்தல் வலையமைப்பில் மிக முக்கிய சாட்சியாகக் கருதப்படுகிறார். எப்ஸ்டீனின் ரகசியத் தீவு, நியூயார்க் மாளிகை மற்றும் பிற நாடுகளுக்குப் பெண்களை ஏற்றிச் சென்றதில் இந்த விமானத்திற்குப் பெரும் பங்கு உண்டு. இளம்பெண்களையும் சிறுமிகளையும் ஆசை வார்த்தை கூறி கவர்ந்திழுத்து இந்த விமானத்தில் ஏற்றியது யார் என்ற விபரங்கள் தற்போது விவாதப் பொருளாகியுள்ளது.
அமெரிக்க முன்னாள் அதிபர்கள் டொனால்ட் டிரம்ப், பில் கிளிண்டன் மற்றும் பிரிட்டன் இளவரசர் ஆண்ட்ரூ போன்ற உலகப் புகழ்பெற்ற முக்கியப் பிரமுகர்கள் எப்ஸ்டீனின் இந்த சொகுசு விமானத்தில் பயணித்துள்ளதாக விமானப் போக்குவரத்து பதிவுகள் (Flight Logs) ஏற்கனவே உறுதிப்படுத்தியுள்ளன. தான் விமானத்தை இயக்கும் போது விமானத்திற்குள் என்ன நடந்தது, எப்ஸ்டீனின் வலையமைப்பில் ‘நம்பர் 2’ அதிகாரியாகச் செயல்பட்ட மேக்ஸ்வெல் சிறுமிகளை எவ்விதம் கையாண்டார் என்பது குறித்து லாரி விசோஸ்கி நீதிமன்றத்தில் விவரித்துள்ளார்.
சமீபத்தில் அமெரிக்க நீதித்துறை வெளியிட்ட லட்சக்கணக்கான எப்ஸ்டீன் ஆவணங்கள் மற்றும் விசாரணைகளின் தொடர்ச்சியாக, இந்த விமானியின் விரிவான வாக்குமூலம் இன்னும் பல சக்திவாய்ந்த மனிதர்களின் முகத்திரையைக் கிழிக்கும் எனப் பாதுகாப்பு வல்லுநர்கள் நம்புகின்றனர். தப்பிப்பிழைத்த பாதிக்கப்பட்ட பெண்களுக்கு நீதி கிடைக்கவும், பல ஆண்டுகளாக மூடி மறைக்கப்பட்ட இந்த சர்வதேச பாலியல் கடத்தல் கும்பலின் முழுப் பின்னணியை அம்பலப்படுத்தவும் இந்த ‘லோலிதா எக்ஸ்பிரஸ்’ விமானியின் சாட்சியமே இறுதி ஆயுதமாகப் பார்க்கப்படுகிறது.
