தமிழகத்தில் அமலாக்கத்துறை (ED) அண்மையில் நடத்திய 258 கோடி ரூபாய் மதிப்புள்ள சர்வதேச போதைப்பொருள் கடத்தல் தடுப்பு சோதனையை அடுத்து, ‘ஜான் பிரிட்டோ’ என்ற பெயர் தமிழக அரசியல் களத்தில் புயலைக் கிளப்பியுள்ளது. தற்போதைய தவெக அரசின் பொதுப்பணித்துறை அமைச்சர் ஆதவ் அர்ஜுனாவின் மாமியாரும் தவெக சட்டமன்ற உறுப்பினருமான லீமா ரோஸ் மார்ட்டினின் சொந்தச் சகோதரர் பெயர் ‘ஜான் பிரிட்டோ’ என்பதால், ஆளுங்கட்சி அமைச்சரின் குடும்பத்திற்குப் போதைப்பொருள் கடத்தல் கும்பலுடன் தொடர்பு இருப்பதாக எதிர்க்கட்சிகளான திமுக மற்றும் அதிமுக கடுமையான குற்றச்சாட்டுகளை முன்வைத்தன
இந்த விவகாரம் பூதாகரமானதை அடுத்து, போதைப்பொருள் வழக்கில் தேடப்படும் ஜான் பிரிட்டோவும், அமைச்சர் ஆதவ் அர்ஜுனாவின் மனைவியின் மாமாவான ஜான் பிரிட்டோவும் வெவ்வேறு நபர்கள் என்ற அதிகாரப்பூர்வத் தகவலை அமலாக்கத்துறை மற்றும் தவெக தரப்பினர் ஆதாரங்களுடன் விளக்கியுள்ளனர். போதைப்பொருள் கடத்தலின் மாஸ்டர்மைண்டாக அமலாக்கத்துறையால் தேடப்படும் ஜான் பிரிட்டோ சென்னை கொடுங்கையூரைச் சேர்ந்த 40 வயது நபர் என்பதும், அவரது தந்தை பெயர் இருதயராஜ் என்பதும் விசாரணையில் தெரியவந்துள்ளது.
மறுபுறம், சர்ச்சையில் இழுக்கப்பட்ட லீமா ரோஸின் சகோதரரான பி. ஜான் பிரிட்டோவுக்கு 48 வயது ஆகிறது. அவர் சென்னை மாநகரக் காவல் ஆணையர் அலுவலகத்தில் நேரில் ஆஜராகி, தனது பெயரில் இருக்கும் ஒற்றுமையைப் பயன்படுத்தி அரசியல் உள்நோக்கத்துடன் பரப்பப்படும் போலிச் செய்திகள் மீது நடவடிக்கை எடுக்கக் கோரிப் புகார் அளித்துள்ளார். தமக்குக் கேரளாவில் லாட்டரி தொடர்பான வழக்கு மட்டுமே நிலுவையில் உள்ளதாகவும், எந்தவொரு போதைப்பொருள் வழக்குடனும் தமக்கு எவ்விதத் தொடர்பும் இல்லை என்றும் அவர் செய்தியாளர்களிடம் திட்டவட்டமாக விளக்கியுள்ளார்.
பெயர்க் குழப்பத்தால் விளைந்த இந்தச் சம்பவத்தை முன்வைத்து, யூடியூபர் மாரிதாஸ் கைது செய்யப்பட்டதுடன், புதிய தவெக அரசு போதைப்பொருள் பணத்தில் இயங்குவதாக எதிர்க்கட்சிகள் போர்க்கொடி தூக்கின. ஆனால், உண்மைத் தரவுகள் வெளியானதைத் தொடர்ந்து, தவெக அரசின் நற்பெயருக்குக் களங்கம் விளைவிக்கவே திமுக ஐடி விங் மற்றும் மாற்று அரசியல் கட்சிகள் இத்தகைய திட்டமிட்ட அவதூறுகளைப் பரப்பி வருவதாக தவெக தரப்பினர் மிகக் கடுமையான பதிலடியைக் கொடுத்து வருகின்றனர்.
