கடந்த 2025-ஆம் ஆண்டு பிப்ரவரி மாதம், பிரிட்டனின் செஷயர் மாகாணத்தில் உள்ள வாரிங்டன் பகுதியில் ஜான் மெக்கோல் (John McColl) என்ற 84 வயது முதியவர் தனது வீட்டிற்குத் திரும்பிக் கொண்டிருந்தார். அப்போது எதிர்பாராதவிதமாகச் சீன் கார்னர் (Sean Garner) என்பவரது வீட்டின் டிரைவ்வே பகுதிக்குள் அவர் நுழைந்துள்ளார். அங்கு ‘டோரெட்டோ’ (Toretto) என்ற சுமார் 46 கிலோ எடையுள்ள எக்ஸ்.எல் புல்லி ரக நாய் அவரை மிகக் கொடூரமாகத் தாக்கத் தொடங்கியது. சுமார் 45 நிமிடங்கள் நீடித்த இந்தத் தாக்குதலில், அந்த நாய் ஜான் மெக்கோலை “உயிரோடு தின்னத் தொடங்கியதாக” (Eaten alive) நீதிமன்றத்தில் அரசுத் தரப்பு வழக்கறிஞர்கள் தெரிவித்ததைக் கேட்டு ஒட்டுமொத்த நீதிமன்றமும் அதிர்ச்சியில் உறைந்தது.
இந்தத் தாக்குதல் நடந்தபோது ஜான் மெக்கோல் உதவியற்ற நிலையில் அலறியுள்ளார். அக்கம்பக்கத்தினர் கோல்ஃப் கிளப் மற்றும் தடிகளால் நாயை விரட்ட முயன்றும், அந்த நாய் அவரை ஒரு “இரை” போலப் பாதுகாத்துத் தொடர்ந்து கடித்தது. சம்பவ இடத்திற்கு வந்த ஆயுதமேந்திய போலீஸாரால் கூட உடனடியாக ஜானைக் காப்பாற்ற முடியவில்லை. இறுதியில் அந்த நாயை 10 முறை துப்பாக்கியால் சுட்ட பின்னரே ஜானை மீட்க முடிந்தது. முகத்தில் மிகக் கடுமையான காயங்களுடன் மருத்துவமனையில் அனுமதிக்கப்பட்ட அவர், ஒரு மாதம் தீவிர சிகிச்சைப் பிரிவில் மரணத்துடன் போராடி 2025 மார்ச் இறுதியில் உயிரிழந்தார்.
இந்த வழக்கின் இறுதி விசாரணை 2026 ஏப்ரல் 17-ஆம் தேதியான இன்று லிவர்பூல் நீதிமன்றத்தில் நடைபெற்றது. இதில் ஜான் மெக்கோலின் பேத்தி கெல்லி பெர்சிவல் பேசுகையில், “உங்கள் நாய் எனது தாத்தாவை உயிரோடு தின்றது, ஆனால் உங்களுக்கோ உங்கள் குடும்பத்திற்கோ அது பற்றி எந்தக் கவலையும் இல்லை” என்று கொலையாளி சீன் கார்னரை நோக்கிக் கண்ணீருடன் கூறினார். நாயின் வயிற்றில் ஜான் மெக்கோலின் காது மற்றும் தசைகள் இருந்ததாக மருத்துவப் பரிசோதனையில் கண்டறியப்பட்ட தகவலும் நீதிமன்றத்தில் சமர்ப்பிக்கப்பட்டது. இந்தத் தாக்குதல் நடந்தபோது சீன் கார்னர் தனது வீட்டை விட்டு வெளியேறியிருந்தது குறிப்பிடத்தக்கது.
வழக்கை விசாரித்த நீதிபதி பிரையன் கம்மிங்ஸ், “ஜான் மெக்கோல் அனுபவித்த வேதனை வார்த்தைகளால் விவரிக்க முடியாதது” என்று கூறி, நாயின் உரிமையாளர் சீன் கார்னருக்கு 12 ஆண்டுகள் சிறை தண்டனை விதித்துத் தீர்ப்பளித்தார். பிரிட்டனில் தடை செய்யப்பட்ட எக்ஸ்.எல் புல்லி ரக நாய்களை உரிமம் இன்றி வளர்த்ததும், பாதுகாப்பற்ற முறையில் அவற்றை வைத்திருந்ததும் கார்னர் மீதான குற்றச்சாட்டுகளாக நிரூபிக்கப்பட்டன. 2026-ஆம் ஆண்டிலும் இத்தகைய ஆபத்தான நாய் வளர்ப்பு மற்றும் பொறுப்பற்ற உரிமையாளர்களால் ஒரு முதியவர் அநியாயமாக உயிரிழந்த சம்பவம் அந்த நாட்டு மக்களிடையே பெரும் கொந்தளிப்பை ஏற்படுத்தியுள்ளது.
