லண்டன் வெஸ்ட்மின்ஸ்டர் நாடாளுமன்றத்தில் இன்று நடைபெற்ற பிரதமருக்கான கேள்வி நேரத்தில் (PMQs), எதிர்க்கட்சித் தலைவி கெமி பேட்னாக், நாட்டின் பாதுகாப்பு மற்றும் ‘பாதுகாப்பு முதலீட்டுத் திட்டம்’ (Defence Investment Plan) தாமதமாவது குறித்து அடுக்கடுக்கான கேள்விகளை எழுப்பினார். ஆனால், அந்தக் கேள்விகளுக்கு நேரடியாகப் பதிலளிக்காமல், பிரதமர் கீர் ஸ்டார்மர் வழக்கம்போல எதிர்க்கட்சிகளின் கடந்தகாலத் தவறுகளைச் சுட்டிக்காட்டிப் பேசத் தொடங்கினார். இதனால் அதிருப்தியடைந்த சபாநாயகர் லிண்ட்சே ஹோயல், பிரதமரின் பேச்சை நடுவிலேயே தடுத்து நிறுத்தி, “எதிர்க்கட்சியைப் பற்றிப் பேசுவதை விடுத்து, கேட்கப்பட்ட கேள்விக்குப் பதில் சொல்லுங்கள்; இது உங்கள் வேலை அல்ல” என்று பகிரங்கமாக எச்சரித்தார்.
இந்த மோதலின் பின்னணியில் ஈரான் போர் மற்றும் பிரிட்டனின் ராணுவ பலவீனம் குறித்த விவாதங்கள் இருந்தன. “இங்கிலாந்தின் ராணுவத் தளங்கள் அச்சுறுத்தலுக்கு உள்ளாகியுள்ள சூழலில், பாதுகாப்புத் திட்டத்தை வெளியிடுவதில் ஏன் இவ்வளவு தாமதம்?” என்று கெமி பேட்னாக் பிரதமரை நோக்கிச் சீறினார். இதற்குப் பதிலளிக்கத் திணறிய ஸ்டார்மர், கன்சர்வேட்டிவ் கட்சியினர் ஈரான் போரை முதலில் ஆதரித்துவிட்டு இப்போது பின்வாங்குவதாகக் கேலி செய்தார். பிரதமரின் இந்த மழுப்பலான பதிலால் அதிருப்தியடைந்த சபாநாயகர், நாடாளுமன்ற மாண்பைக் காக்க அவரைத் தலையிட்டுத் திருத்த வேண்டிய கட்டாயம் ஏற்பட்டது.
சபாநாயகரின் இந்த ‘டோஸ்’ (Dressing Down) காரணமாகச் சபையில் பெரும் கூச்சல் குழப்பம் ஏற்பட்டது. பிரதமரின் பதில்கள் திருப்திகரமாக இல்லை என்றும், அவர் கேள்விகளைத் தவிர்ப்பதையே (Dodging) வாடிக்கையாக வைத்துள்ளார் என்றும் கன்சர்வேட்டிவ் எம்பிக்கள் முழக்கமிட்டனர். “நாட்டின் பாதுகாப்பை விட உங்களுக்கு அரசியல்தான் முக்கியமா?” என்று பேட்னாக் கேட்ட கேள்விக்கு, ஸ்டார்மர் கோபத்துடன் பதிலளித்த விதம், அவர் மிகுந்த அழுத்தத்தில் இருப்பதை வெளிப்படுத்தியது. விவாதம் முடிந்ததும், பிரதமர் ஸ்டார்மர் சபாநாயகருடன் கோபமாகச் சில வார்த்தைகளைப் பரிமாறிவிட்டுச் சபையிலிருந்து விறுவிறுவென வெளியேறியது அங்கிருந்த கேமராக்களில் பதிவாகியுள்ளது.
ஏற்கனவே ஈரான் போர் காரணமாகப் பெட்ரோல் விலை உயர்வு மற்றும் பொருளாதார நெருக்கடி நிலவும் சூழலில், நாடாளுமன்றத்தில் பிரதமருக்கு ஏற்பட்ட இந்தச் சங்கடம் அவரது இமேஜைப் பாதித்துள்ளது. “சபாநாயகர் நடுநிலையாகச் செயல்படவில்லை” என்று லேபர் கட்சி ஆதரவாளர்கள் குற்றம் சாட்டினாலும், “பிரதமர் பதில் சொல்லத் தெரியாமல் தவிக்கிறார்” என்று எதிர்க்கட்சிகள் விமர்சித்து வருகின்றன. ஏப்ரல் 2026-ன் இந்த நாடாளுமன்ற மோதல், வரும் உள்ளாட்சித் தேர்தல்களில் பெரிய தாக்கத்தை ஏற்படுத்தும் என எதிர்பார்க்கப்படுகிறது.
