மெட்டா நிறுவனத்தின் தலைமை நிர்வாக அதிகாரி (CEO) மார்க் ஜுக்கர்பெர்க், கடந்த ஏப்ரல் 30 அன்று ஊழியர்களுடன் நடத்திய ரகசியக் கூட்டத்தின் ஆடியோ பதிவு தற்போது இணையத்தில் கசிந்து வைரலாகி வருகிறது. அந்தப் பதிவில், மெட்டா நிறுவனம் தனது ஊழியர்களின் மவுஸ் அசைவுகள், கீபோர்டு அழுத்தங்கள் மற்றும் கணினித் திரைச் செயல்பாடுகளைக் கண்காணிக்கும் ‘மாடல் கேபபிலிட்டி இனிஷியேட்டிவ்’ (MCI) என்ற மென்பொருளை ஊழியர்களின் மடிக்கணினிகளில் கட்டாயமாக நிறுவியதை ஜுக்கர்பெர்க் ஒப்புக்கொண்டுள்ளார். மேலும், “வெளியில் இருக்கும் ஒப்பந்த ஊழியர்களை விட எங்கள் நிறுவன ஊழியர்களின் சராசரி புத்திசாலித்தனம் மிக அதிகம்; எனவே ஏஐ மாடல்களுக்குக் கோடிங் மற்றும் சிக்கலான பணிகளைக் கற்றுக்கொடுக்க இவர்களின் செயல்பாடுகளைப் பயன்படுத்துகிறோம்” என்றும் அவர் பேசியுள்ளார்.
இந்தக் கண்காணிப்பு நடவடிக்கை முடிவடைந்த சில நாட்களிலேயே, மெட்டா நிறுவனம் தனது உலகளாவிய பணியாளர்களில் சுமார் 10 சதவீதப் பேரை, அதாவது 8,000 ஊழியர்களைத் திடீரெனப் பணிநீக்கம் செய்துள்ளது. இதனால், ஊழியர்கள் தங்களது சொந்தத் திறமைகளையும், வேலை செய்யும் முறைகளையும் கொண்டு தங்களையே மாற்றீடு செய்யக்கூடிய ஏஐ ரோபோக்களுக்குப் பயிற்சி அளிக்கப் பயன்படுத்தப்பட்டுள்ளோம் என்பதை உணர்ந்து கடும் கொந்தளிப்பில் உள்ளனர். நிறுவனத்தின் இந்த நடவடிக்கை குறித்து ஊழியர்கள் அதிருப்தி தெரிவித்த போது, மெட்டாவின் தொழில்நுட்ப அதிகாரி (CTO) ஆண்ட்ரூ போஸ்வொர்த், “இந்தக் கண்காணிப்பில் இருந்து ஊழியர்கள் விலகுவதற்கு (Opt-out) எவ்வித வாய்ப்பும் இல்லை” என்று கறாராகப் பதிலளித்துள்ளார்.
இந்த விவகாரம் குறித்துப் பாதுகாப்பு மற்றும் தனியுரிமை ஆர்வலர்கள் தங்களது கடுமையான கண்டனங்களைப் பதிவு செய்து வருகின்றனர். ஊழியர்களின் உற்பத்தித் திறனைக் கண்காணிப்பது வேறு, ஆனால் அவர்களின் அறிவுத் திறனைத் திருடி அவர்களுக்குப் பதிலாக ஏஐ-யை அமர வைப்பது அப்பட்டமான மனித உரிமை மீறல் என்று அவர்கள் சாடியுள்ளனர். அமெரிக்கச் சட்டங்களில் பணியிடக் கண்காணிப்புக்குக் கடுமையான கட்டுப்பாடுகள் இல்லாததை மெட்டா தனக்குச் சாதகமாகப் பயன்படுத்திக் கொண்டதாகவும், ஆனால் ஐரோப்பிய நாடுகளில் இத்தகைய கடுமையான கண்காணிப்புச் சட்டவிரோதமானது என்பதால் அங்குள்ள ஊழியர்கள் இதிலிருந்து தப்பியுள்ளனர் என்பதும் வெளிச்சத்திற்கு வந்துள்ளது.
மெட்டா நிறுவனம் இந்த 2026 ஆம் ஆண்டில் மட்டும் ஏஐ தொழில்நுட்ப உள்கட்டமைப்பிற்காக சுமார் 135 பில்லியன் டாலர்களை முதலீடு செய்து வரும் வேளையில், இந்த அதிரடிப் பணிநீக்கங்கள் அரங்கேறியுள்ளன. ஜுக்கர்பெர்க் இந்தத் திட்டத்தை மிகவும் ரகசியமாக வைத்திருந்ததற்குக் காரணம், இந்தத் தனித்துவமான ஏஐ பயிற்சி உத்தி தங்களது போட்டி நிறுவனங்களுக்குத் தெரிந்துவிடக் கூடாது என்பதற்காகத்தான் என்றும் கசிந்த ஆடியோவில் கூறியுள்ளார். ‘வேலையை வாங்குவதற்கு முன்பாகவே அதற்கான மாற்று இயந்திரத்திற்குப் பயிற்சி அளிக்க ஊழியர்களைப் பயன்படுத்திய’ மெட்டாவின் இந்த கார்ப்பரேட் தந்திரம், ஒட்டுமொத்த தகவல் தொழில்நுட்பத் துறையினரையும் அச்சத்தில் ஆழ்த்தியுள்ளது.
